Fevralın 14-də Azərbaycan Milli Elmlər Akademiyası (AMEA) Rəyasət Heyətinin iclası keçirilib. Rəsmi məlumata görə, iclası giriş sözü ilə açan AMEA prezidenti Ramiz Mehdiyev yaşı ilə əlaqədar postunu tərk etməyə qərar verdiyini deyib. O, akademiyanın böyük yol keçdiyini və daim dövlətin yanında durmalı olduğunu vurğulayıb: “Alimlərimizin fəaliyyəti də bu yöndə olmalı, bütün işlər dövlət siyasətinə uyğun qurulmalıdır”.
Prezident İlham Əliyevin onun fəaliyyətinə hər zaman yüksək qiymət verdiyini deyən Ramiz Mehdiyev “Heydər Əliyev” ordeni ilə təltif edildiyini xatırladıb: “Cənab prezidentin mənə münasibəti çox istidir. Mən həmişə bir əqidəyə sadiq olmuşam: əvvəl dövlət, sonra şəxsi məsələlər. Cənab prezident İlham Əliyev Heydər Əliyevin siyasətini həyata keçirir. Alimlərimiz, akademiyanın üzvləri də bu yolda prezidentin yanında olmalıdırlar”.
Akademiya prezidenti istefa ərizəsi ilə dövlət başçısına müraciət edəcəyini bildirib.
1938-ci il təvəllüdlü Ramiz Mehdiyev fəlsəfə elmləri doktorudur. Milli Elmlər Akademiyasına 2019-cu il oktyabrın 23-dən prezidentlik edir.
Son vaxtlar bir çox alim, ictimai xadim və siyasətçi onu istefaya çağırırdı.
Fevralın 10-da “Amerikanın səsi” radiosuna yazılı açıqlama verən Ramiz Mehdiyev demişdi ki, onu prezident vəzifəsinə AMEA-nın ümumi yığıncağı seçib və ölkə prezidenti bu seçimi təsdiqləyib: “Məni istefaya göndərmək səlahiyyəti prezidentə məxsusdur. AMEA-dakı bəzi şəxslərin öz hədlərini aşaraq dövlət başçısının səlahiyyətlərinə müdaxilə etmək cəhdlərini qəbuledilməz sayıram.
Sağlamlığımda heç bir problem yoxdur, özümü yaxşı hiss edirəm, işimin başındayam. Bundan sonra da AMEA qarşısında dövlətin qoyduğu vəzifələrin keyfiyyətli icrası üçün əlimdən gələni edəcəyəm”.
1965-ci ildən Azərbaycanın komsomol və partiya təşkilatlarında rəhbər vəzifələr tutan Ramiz Mehdiyev 1980-ci ildən Azərbaycan Kommunist Partiyası Mərkəzi Komitəsinin şöbə müdiri, 1983-cü ildən katibi postlarında çalışıb.
1988-1994-cü illərdə Elmlər Akademiyasının İctimai-Siyasi Tədqiqatlar və İnformasiya İnstitutunun şöbə müdiri olub.
1994-cü ildən Prezidentin İcra Aparatının ümumi şöbəsinə müdirlik edib, 1995-ci ildən 2019-cu il oktyabrın 23-dək Prezident Administrasiyasının (2009-cu ilədək Prezidentin İcra Aparatı adlanıb) rəhbəri olub.
Təhlükəsizlik Şurasının üzvüdür.
“Heydər Əliyev”, “İstiqlal”, “Şöhrət” və “Şərəf” ordenləri ilə təltif olunub.
Novator.az bildirir ki, AMEA-nın əsası 1945-ci ildə qoyulub. Nizamnaməsinə görə, AMEA ölkədə elmin inkişafını təşkil və təmin edən, dövlətin elmi və elmi-texniki siyasətini həyata keçirən, elmi müəssisə və təşkilatların, ali təhsil müəssisələrinin elmi-tədqiqat fəaliyyətini əlaqələndirən və istiqamətləndirən, ölkəni elmi-texniki fəaliyyət sahəsində xaricdə təmsil edən dövlət ali elmi təşkilatıdır.
Akademiyanın ali idarəetmə orqanı onun ümumi yığıncağıdır. Rəyasət Heyəti akademiyanın kollegial icra orqanıdır.
Qurumun fəaliyyətinə rəhbərlik edən AMEA prezidenti ümumi yığıncaqda gizli səsvermədə 5 il müddətinə seçilir və Azərbaycan prezidentinin sərəncamı ilə təsdiqlənir. Ümumi yığıncaqda AMEA prezidenti seçilmək üçün səsvermədə iştirak edən həqiqi üzvlərin üçdə iki səs çoxluğu tələb olunur.
Ramiz Mehdiyev Milli Elmlər Akademiyasının prezidenti oldu
Toy qırğını: Siyavuş Novruzov istefa verdi
