İki problemin bir həlli
London İqtisadiyyat Məktəbinin professoru, müxalif siyasətçi Qubad İbadoğlu Azərbaycan Milli Elmlər Akademiyasının (AMEA) ləğvi təklifində israr edir.
Son vaxtlar bir çox alim, ictimai xadim və siyasətçi AMEA prezidenti Ramiz Mehdiyevin istefası tələbini irəli sürür.
Ramiz Mehdiyev fəlsəfə elmləri doktorudur, Milli Elmlər Akademiyasına 2019-cu il oktyabrın 23-dən prezidentlik edir.
O, 1995-2019-cu illərdə Prezident Administrasiyasının (2009-cu ilədək Prezidentin İcra Aparatı adlanıb) rəhbəri olub. Təhlükəsizlik Şurasının üzvüdür.
Novator.az-ın məlumatına görə, Qubad İbadoğlu yazır ki, hücumlara məruz qalan Ramiz Mehdiyevi müdafiə etmək fikri yoxdur: “Azərbaycanda rejimin avtoritarlaşmasında, xalqın acınacaqlı durumunda onun payı İlham Əliyevdən az olmayıb. Amma vaxtilə onun qəbuluna əyilə-əyilə girib-çıxanların bu gün ona qarşı çıxması fonunda bəzi fikirlərimi bölüşmək istərdim.
Ramiz Mehdiyevi mətbuatda vurmaqla istefaya göndərə bilməyəcəklər. Hətta buna nail ola bilsələr də, bu, Azərbaycan elminin problemini həll etməyəcək. Ramiz Mehdiyevi kim əvəzləyəcək? Ömrü boyu regionçuluqdan faydalanan bisavadlar üçün belə perspektivin açılması elmin dəfni deməkdir.
Odur ki, yenə təklif edirəm: Milli Elmlər Akademiyası ləğv olunmalı, onun bazasında sosial elmlər, təbiət elmləri, dəqiq elmlər, tibb elmləri akademiyaları adı altında müxtəlif elmi məktəblər formalaşdırılmalı və onlar arasında rəqabət mühiti yaradılmalıdır. Bundan sonra elmin idarəçiliyi özünüidarəetmə formasına keçməli, maliyyələşmə və təltiflər elmi uğurlara bağlanmalıdır. Bununla həm elm problemini həll etmək olar, həm də Ramiz Mehdiyev problemini”.
