Bir hesabat, üç işarə
Gürcüstanın Mərkəzi Bankı bank sektorunun dayanıqlığını bir sıra ölkə ilə müqayisə edib. Hesabata nəzər salan iqtisadçı Rövşən Ağayev yazır ki, Gürcüstanda ev təsərrüfatlarına verilən kreditlərin ümumi daxili məhsulda payı 32 faizə yaxındır: “Ermənistanda bu göstərici 29 faiz, Polşada 35,5 faiz, Almaniyada 58 faiz, ABŞ-da 79 faiz, Böyük Britaniyada 94 faizdir”.
Novator.az-ın məlumatına görə, ekspert Azərbaycanda ev təsərrüfatları üzrə kreditlərin ümumi daxili məhsulda payının 2021-ci ildə 9 faizi bir az ötdüyünü vurğulayır: “Bu qədər aşağı göstərici dolayısı ilə üç məsələyə işarədir: biznesin inkişafında olduğu kimi ev təsərrüfatlarının da tələbatının qarşılanmasında bankların məhdud töhfəsinə; bank sektorunun kredit resurslarının bahalığına, şərtlərinin ağırlığına və sərfəli olmamasına; ev təsərrüfatlarının gəlir imkanlarının, rəsmi gəlir mənbələrinin məhdudluğu səbəbindən banklar üçün riskli müştəri seqmenti olmasına”.
