Ermənistan seçki yolunda
Fevralın 1-də Ermənistan parlamentinin sədri Alen Simonyan Armen Sərkisyanın prezident səlahiyyətlərinə xitam verilməsi barədə protokol imzalayıb. Yeni prezident seçilənə qədər dövlət başçısı səlahiyyətlərini Alen Simonyan icra edəcək.
Armen Sərkisyan yanvarın 23-də istefa verib.
Konstitusiyaya görə, prezident seçkisi maksimum 35 gün ərzində keçirilməlidir. Namizədlik üçün parlament deputatlarının azı dörddə birinin dəstəyi gərəkdir. İlk turda seçilmək üçün deputatların dörddə üçünün səsi tələb olunur. İkinci turda namizəd deputatların beşdə üçünün səsini toplamalıdır. Üçüncü turda qələbə üçün sadə səs çoxluğu müəyyən edilib.
Ermənistan parlamenti 107 deputatdan ibarətdir. Baş nazir Nikol Paşinyanın sədrlik etdiyi hakim Vətəndaş Sazişi Partiyası qanunverici orqanda 71 mandatla təmsil olunur. Bu qurumun prezident kürsüsünə yüksək texnologiyalar sənayesi naziri Vaahn Xaçaturyanı namizəd göstərəcəyi açıqlanıb. Novator.az bildirir ki, Vaahn Xaçaturyan 1959-cu il aprelin 22-də doğulub. Yerevan Xalq Təsərrüfatı İnstitutunu iqtisadçı ixtisası ilə bitirib. 1982-ci ildən “Razdanmaş” İstehsalat Birliyində çalışıb, 1989-cu ildən “Mars” dövlət müəssisəsində baş direktorun müavini postunu tutub.
1992-1996-cı illərdə paytaxt Yerevanın meri, 1996-1998-ci illərdə Ermənistan prezidentinin müşaviri, 1995-1999-cu illərdə parlamentin deputatı olub.
2000-ci ildən vətəndaş cəmiyyəti qurumlarında rəhbər vəzifələrdə işləyib, 2019-2021-ci illərdə bank sistemində fəaliyyət göstərib.
2021-ci il avqustun 4-dən yüksək texnologiyalar sənayesi naziridir.
Ermənistan prezidentindən istefa bəyanatı
