Azadlıq bölgəsinə səfərdə yeniliklər
Rəqəmsal İnkişaf və Nəqliyyat Nazirliyi işğaldan azad olunmuş ərazilərə avtobus marşrutlarını yeniləyir.
Yanvarın 24-dən Dövlət Avtomobil Nəqliyyatı Xidməti Bakıdan Şuşaya, Ağdama, Əhmədbəylidən Şuşaya, Füzuli Beynəlxalq Hava Limanından Şuşaya, Bərdədən Ağdama müntəzəm avtobus marşrutları istifadəyə verib. Reyslər Əhmədbəyli-Şuşa marşrutu üzrə həftədə 4 dəfə, digər istiqamətlər üzrə 2 dəfə təşkil edilib.
Füzuli Beynəlxalq Hava Limanı-Şuşa avtobus marşrutunun fəaliyyəti təyyarə aviareyslərinə bağlıdır.
Eyni şəxsin bir istiqamətdə ildə yalnız bir dəfə səfər etmək hüququ olub.
Yanvarın 31-də yayılan rəsmi məlumatda qeyd olunur ki, təhlillər nəticəsində Bakı-Şuşa-Bakı marşrutuna tələbatın daha çox olduğu müəyyən edilib və bu istiqamətdə əlavə reysin açılması qərara alınıb. Fevralın 16-dan bu istiqamətdə həftədə 3 dəfə avtobus reysi həyata keçiriləcək.
Fevralın 22-dən Əhmədbəyli-Şuşa-Əhmədbəyli marşrutu üzrə səfərlər həftədə 2 dəfə, mart ayından Bakı-Ağdam-Bakı marşrutu üzrə səfərlər həftədə 1 dəfə, Bərdə-Ağdam-Bərdə marşrutu üzrə səfərlər həftədə 2 dəfə olacaq.
Bir dəfə səfər etmək məhdudiyyəti aradan qaldırılıb, vətəndaşlar hər hansı məhdudiyyət olmadan istənilən istiqamət üzrə səfərlər edə bilərlər.
Ermənistan 1988-1994-cü illərin təcavüzündə Azərbaycanın bütün cənub-qərbini ələ keçirib.
2020-ci il sentyabrın 27-dən Azərbaycanın apardığı hərbi əməliyyatlarda və noyabrın 10-na keçən gecə əldə edilən atəşkəs razılaşması nəticəsində Cəbrayıl, Füzuli, Zəngilan, Qubadlı, Ağdam, Kəlbəcər rayonları tam, Şuşa, Laçın, Xocavənd, Xocalı rayonları və keçmiş Ağdərə rayonu qismən azad olunub.
