Azər Qasımlı
Rusiya ABŞ başda olmaqla NATO-dan öz təhlükəsizliyinə yazılı təminat tələb edir. Lakin özü qonşu ölkələrin təhlükəsizliyinə təminat vermək istəmir. Təhlükəsizlik, müstəqillik, ərazi bütövlüyü məsələlərini postsovet ölkələri ilə deyil, üçüncü ölkələrlə danışması dünyanı maraqlar sferasına bölmək cəhdidir.
Rusiya Azərbaycanın təhlükəsizliyinə yazılı təminat verməlidir. İlk növbədə Dağlıq Qarabağ daxil olmaqla ərazi bütövlüyümüzü tanımalıdır, “sülhməramlı kontingent”ini Qarabağdan çıxarmalıdır və daxili işlərimizə qarışmamalıdır. Bunu etsə, biz də NATO-ya üzv olmayacağımıza, Türkiyənin hərbi bazalarını ərazimizdə yerləşdirməyəcəyimizə təminat verə bilərik. Belə bir müqavilədə Türkiyənin də iştirakçı olması şərtdir.
Təhlükəsizliyimizə və ərazi bütövlüyümüzə təminat verməyən, bu məsələləri bizimlə deyil, üçüncü ölkələrlə danışmağa meyilli olan Rusiyanın Dağlıq Qarabağdan çıxmaq istəməyəcəyi gün kimi aydındır. Onları müharibə ilə də oradan çıxartmaq üçün yetərli hərbi gücümüz və siyasi imkanımız yoxdur.
Bir sözlə, təminat almadığımız təqdirdə NATO ilə geniş əməkdaşlıq etməli, gələcəkdə zamanı yetişəndə alyansa üzvlük məsələsini də gündəmə gətirməli, Türkiyənin hərbi bazalarının ilk növbədə Şuşa və Hadrutda yerləşdirilməsini razılaşdırmalıyıq.
Əliyev iqtidarından bu xətti tutmaq gözləntim yoxdur. Bunları yalnız demokratik hökumət və sovet elitasına aid olmayan siyasətçilər edə bilər!
Müəllifin başqa yazıları:
