“Yeni Nəsil” Jurnalistlər Birliyinin sədri Arif Əliyev, İnternetin İnkişafı Forumunun sədri Osman Gündüz, “Ayna-Zerkalo” qəzetinin baş redaktoru Elçin Şıxlı, “Turan” İnformasiya Agentliyinin direktoru Mehman Əliyev, “Jurnalistika və İnkişaf Mərkəzi” İctimai Birliyinin sədri Qulu Məhərrəmli, media hüququ üzrə mütəxəssislər Ələsgər Məmmədli və Xalid Ağalıyev prezident İlham Əliyevə müraciət ediblər.
Novator.az-ın məlumatına görə, müraciət “Media haqqında” qanun layihəsi ilə bağlıdır.
2021-ci il dekabrın 10-da üzə çıxmış layihə dekabrın 30-da Milli Məclisdə son oxunuşda qəbul olunub.
Dövlət başçısına müraciətdə vurğulanır ki, layihə ictimai müzakirələr aparılmadan, müstəqil KİV nümayəndələrinin və hüquqşünasların rəyi nəzərə alınmadan hazırlanıb və parlamentə təqdim edilib: “Layihənin mətni parlament komitəsinin müzakirəsindən cəmi bir gün qabaq açıqlanıb. Bundan sonra biz dar zaman kəsiyində layihənin mürtəce, media və ifadə azadlığı standartları ilə üst-üstə düşməyən məzmununun yaxşılaşdırılmasına xidmət edən təkliflər paketi hazırlayıb parlamentə təqdim etmişik. Ancaq təəssüflər olsun ki, irəli sürdüyümüz vacib təkliflər də diqqətsiz qalıb. Milli Məclis yekunda texniki məzmunlu bir neçə dəyişiklik etməklə layihəni qəbul edib”.
Müraciətdə deyilir ki, media qanunları standartlarına uyğun gəlməyən, mətni mücərrəd, anlayışları dolaşıq olan qanun layihəsi jurnalistika fəaliyyətini tamamilə dövlət tənzimləməsinə tabe etdirməyə yönəlib: “O, kimin qanuni jurnalistika fəaliyyəti ilə məşğul ola biləcəyini müəyyənləşdirməkdən tutmuş onlayn mediaların icra orqanından lisenziya və ya rəy almalı olması şərtinə qədər bütün həlledici tənzimləmələrin açarını dövlətə təslim edir”.
Müraciətdə bildirilir ki, layihənin istər hazırlanması prosesi, istərsə də məzmunu “İnformasiya əldə etmək haqqında” qanuna, Azərbaycan Konstitusiyasına və ölkəmizin tərəfdaş çıxdığı beynəlxalq müqavilələrin media azadlığı ilə bağlı müddəalarına ziddir. Buna görə də prezident İlham Əliyevdən “Media haqqında” qanun layihəsini imzalamamaq, layihəni yenidən işlənməsi üçün parlamentə qaytarmaq xahiş olunur.
Azərbaycan Konstitusiyasının 97-ci maddəsinə görə, qanunlar Milli Məclisdə qəbul edildiyi gündən 14 gün müddətində imzalanmaq üçün prezidentə təqdim olunmalıdır.
Konstitusiyanın 109-cu maddəsinin 19-cu bəndi prezidentə qanunları imzalamaq və dərc etmək hüququ verir.
110-cu maddəyə görə, prezident qanunları ona təqdim olunmuş gündən başlayaraq 56 gün ərzində imzalamalıdır. Qanun prezidentin etirazını doğurursa, o, qanunu imzalamayıb öz etirazları ilə birlikdə Milli Məclisə qaytara bilər.
“Media haqqında” qanunun qeyri-rəsmi layihəsi
Media qanunu ilk oxunuşda (Rəsmi layihə)
Xalq Partiyası media qanunu layihəsinə qarşı çıxdı
Media qanunu: layihəni geri çəkmək təklif olunur
Media qanunu: reaksiyalara reaksiya verildi
Media qanunu: 8 partiyadan çağırış gəldi
Media qanunu: bir razılaşma var
Media qanununa yazılı təkliflər
Media qanunu: son oxunuş neçə maddəyə əl gəzdirir?
“Media qanunu qəbul olunsa da…”
