Gəncə Hərbi Məhkəməsinin müraciətinə əsaslanan Konstitusiya Məhkəməsinin Plenumu İnzibati Xətalar Məcəlləsinin 34-1-ci və 156.2-ci maddələrini 30.2-ci, 610-618-ci maddələri ilə əlaqəli şəkildə şərh edib.

Novator.az bildirir ki, 34.1-ci maddəyə əsasən, bir şəxs iki və ya daha çox inzibati xəta törətdikdə onun barəsində hər bir inzibati xətaya görə ayrılıqda inzibati tənbeh tətbiq olunur.

156.2-ci maddəyə görə, hərbi xidmət əleyhinə olan inzibati xətalar törətmiş şəxslər inzibati həbsi hauptvaxtda, digər şəxslər müvafiq icra hakimiyyəti orqanının müəyyən etdiyi yerlərdə çəkir.

30.2-ci maddə inzibati həbsin tətbiqinə yasaq hallarını tənzimləyir.

610-618-ci maddələr hərbi xidmət əleyhinə olan inzibati xətalara görə məsuliyyəti nəzərdə tutur.

Konstitusiya Məhkəməsinin yanvarın 13-də açıqlanan qərarında qeyd olunur ki, hərbi xidmət əleyhinə olan inzibati xətalar törətmiş, lakin hərbi xidmətdən tərxis olunduğu üçün hərbi qulluqçu statusunu itirən şəxsin hauptvaxtda saxlanması məcəllənin 156.2-ci maddəsinin hüquqi mahiyyətinə və məqsədinə uyğun deyil, onlar müvafiq icra hakimiyyəti orqanının müəyyən etdiyi yerlərdə mühafizə altında saxlanmalıdır: “34-1-ci maddənin mənasına uyğun olaraq hakim hərbi xidmət əleyhinə inzibati xətaların törədilməsinə görə şəxs barəsində inzibati həbs əvəzinə cərimə növündə tənbeh tətbiq edə bilməz.

Məhkəmələr hərbi xidmət əleyhinə inzibati xətaları törətmiş şəxslər barəsində tənbeh tətbiq edərkən onların Azərbaycanın ərazi bütövlüyünün qorunmasında, dövlətin müdafiəsi və təhlükəsizliyinin təmin edilməsində müstəsna xidmətlərini, habelə şəxsiyyətini xarakterizə edən müsbət halları yüngülləşdirici hal qismində nəzərə almalıdır”.