İctimai fəal Qiyas İbrahimov yanvarın 7-si Bakının mərkəzində, Prezident Administrasiyasının binası qarşısında üstünə benzin tökərək özünü yandırmağa cəhd edib. Ərazidəki mühafizə xidmətinin təmsilçiləri və polis əməkdaşları ona mane olub. “Turan”ın məlumatına görə, Qiyas İbrahimov bu aksiya ilə Avropa İnsan Hüquqları Məhkəməsinin qərarı əsasında ona ödənməli olan təzminatın verilməməsinə etiraz etdiyini bildirib.

Qiyas İbrahimov başqa ictimai fəal Bayram Məmmədovla birgə 2016-cı il mayın 10-u Bakıda tutulub. Onlar külli miqdarda narkotik vasitə saxlamaqda təqsirli bilinərək 10 il müddətinə azadlıqdan məhrum ediliblər. Sonradan Qiyas İbrahimovun cəzası 3 ay artırılıb.

Müdafiəçiləri fəalların həbsini siyasi sifariş sayıb, bildiriblər ki, 2016-cı il mayın 10-na keçən gecə mərhum prezident Heydər Əliyevin Bakının mərkəzindəki abidəsinə etiraz şüarları yazılıb, gənclər bu şüarlara görə tutulublar.

2019-cu il martın 17-də hər iki gənc prezidentin əfv sərəncamı ilə azadlığa buraxılıb.

2020-ci il fevralın 13-də Avropa İnsan Hüquqları Məhkəməsi Qiyas İbrahimov və Bayram Məmmədovun şikayətləri üzrə qərarını açıqlayıb. Fəalların işgəncəyə məruz qalmamaq hüququnun, azadlıq və toxunulmazlıq hüququnun və başqa hüquqlarının pozulduğu qənaətinə gələn məhkəmənin qərarında Azərbaycan dövlətinin onlara ümumilikdə 72 min avro təzminat ödəməsi tələbi yer alıb.

2021-ci ildə Türkiyənin İstanbul şəhərinə gedən Bayram Məmmədov mayın 2-si orada həlak olub. Rəsmi versiyaya görə, Bayram Məmmədov parkda gəzişərkən dənizə düşən başmağını götürmək üçün suya girəndə batıb.

Bayram Məmmədov mayın 9-u Bakıda dəfn olunub.