KTMT Qazaxıstana nə qədər qüvvə göndərib?
Qazaxıstanda yanvarın 2-də sosial və siyasi tələblərlə başlayan kütləvi aksiyalar yanvarın 5-dən hökumət qüvvələri ilə toqquşmalara və iğtişaşlara gətirib. Çoxlu ölən və yaralanan var, minlərlə şəxs tutulub.
Prezident Qasım-Comərd Tokayev ölkədə sabitliyin bərpası üçün yanvarın 5-də Kollektiv Təhlükəsizlik Müqaviləsi Təşkilatından (KTMT) yardım istəyib. Yanvarın 6-dan başlayaraq KTMT-nin sülhməramlı hərbi kontingenti Qazaxıstana yeridilir.
Novator.az bildirir ki, hərbi kontingentdə Rusiya 3000 nəfərlə təmsil olunur.
Belarus Qazaxıstana 500, Tacikistan 200, Qırğızıstan 150, Ermənistan 100 hərbçi göndərmək qərarı verib.
Qazaxıstan hökuməti istefaya göndərildi
Qazaxıstan üsyanı Nazarbayevi aşırır
Qazaxıstan hadisələrinin üzdə olan xronologiyası
Qazaxıstana hərbi müdaxilə nəyə gətirəcək?
Qazaxıstanda Putin doktrinası – “Bloomberg”
Kollektiv Təhlükəsizlik Müqaviləsi Təşkilatının əsası 1992-ci ildə Rusiya, Ermənistan, Qazaxıstan, Özbəkistan, Qırğızıstan və Tacikistanın dövlət başçılarının imzaladığı müqavilə ilə qoyulub. Hərbi təcavüzə qarşı birgə müdafiəni də nəzərdə tutan, 5 il müddətinə imzalanmış sənədə 1993-cü ildə Belarus, Azərbaycan və Gürcüstan da qoşulub. 1994-cü ildə kollektiv təhlükəsizlik müqaviləsi qüvvəyə minib.
1999-cu ildə Rusiya, Belarus, Ermənistan, Qazaxıstan, Qırğızıstan və Tacikistan müqavilənin hər 5 ildən bir avtomatik uzadılmasını nəzərdə tutan protokolu imzalayıblar. Azərbaycan, Gürcüstan, Özbəkistan bu addımı atmayıblar.
2006-2012-ci illərdə Özbəkistan yenidən KTMT-də təmsil olunub.
KTMT-nin ali orqanı Kollektiv Təhlükəsizlik Şurasıdır (üzv ölkələrin liderlərinin daxil olduğu orqan). Qurumun ali vəzifəli şəxsi baş katibdir. Hazırda bu vəzifəni belaruslu Stanislav Zas tutur.
