Zaman məsələsi
Arif Hacılı
Müsavat Partiyasının başqanı
Vasif Talıbov demişdi müxalifəti (etirazçıları) o günə salmaq lazımdır ki, yalnız çörək barədə düşünsünlər, siyasətə və başqa məsələlərə nəinki qarışmaq, hətta bu barədə düşünmək imkanları olmasın. Belə görünür hakimiyyət bu təlimata uyğun davranır. Əks halda yerin altından qaz və neft halında çıxıb ölkəyə 100 milyardlarla gəlir gətirən sərvətlərimiz, gecə-gündüz arı kimi çalışan xalqımız olduğu halda əksər vətəndaşımızın yoxsul vəziyyətdə yaşamağa məhkum edilməsinin izahı nədir?
Hakimiyyət sanki ölkə əhalisinin çox tutumlu səbir kasasına arxayın olaraq göydən başımıza yağan sərvətlərin nəyin bahasına olursa-olsun xalqa çatmasına imkan verməməyə çalışır. Xalqın dolanışığını təmin etməli olan hakimiyyət, əksinə, hər vasitə ilə insanların gəlirlərini məhdudlaşdıran, dolanışıqlarını çətinləşdirən qərarlar qəbul edir. Qazaxıstan hadisələri də göstərdi ki, iradəsi nəzərə alınmayan xalqın səbir kasasının daşması yalnız zaman məsələsidir. Bir gün tez, bir gün gec, amma hökmən baş verəcək.
