“Gün gələcək…”
İctimai-siyasi fəalların dekabrın 1-i Bakının Fəvvarələr meydanında məhbus Saleh Rüstəmova azadlıq tələbi ilə keçirdiyi aksiya fonunda inzibati həbs cəzası almış 5 nəfərin 4-ü azadlıqdadır. Dekabrın 2-də Səbail Rayon Məhkəməsinin 30 sutkalıq cəza kəsdiyi AXCP Ali Məclisi Rəyasət Heyətinin üzvü İlham Hüseyn hələ də həbsdədir. Novator.az-ın məlumatına görə, AXCP sədri Əli Kərimli yazır ki, İlham Hüseyn ölkənin ən işıqlı gənclərindəndir: “Perspektivli siyasətçidir. Hər zaman mübarizənin önündə olan dostlarımızdandır. İntellektualdır, şairliyi də var, sinədəftərdir. Hər kəslə öz dilində danışa bilir. Mitinqlərimizin uğurlu aparıcısıdır. Yaxşı təşkilatçıdır.
Əslində gerçək dövlət adamıdır. Ancaq təəssüf ki, o da digər dostlarımız kimi öz qabiliyyətini ölkənin idarə olunmasına həsr etməkdənsə vaxtaşırı qanunsuz həbslərlə üzləşir. İlham bəy indiyədək çox təzyiqlərə məruz qalıb. Neçə dəfə inzibati həbs aldığını, əminəm, özü də unudub. İndi yenə həbsdədir. İlham bəyi belə həbslər yolundan döndərə bilməz. Təəssüf ki, bu ölkədə bacarıqlı, ləyaqətli, mübariz insanların əksəriyyəti eyni taleyi yaşayır. Ancaq həmişə belə olmayacaq. Bu ölkənin də önü açılacaq. Gün gələcək, bu ölkədə də insanlar rüşvətə, qohumbazlığa, yaltaqlığa görə deyil, qabiliyyətinə, ləyaqətinə, peşəkarlığına görə irəli çəkiləcək. Qabiliyyətli və ləyaqətli siyasətçilərin sorağı həbsxanalardan deyil, parlament və hökumətdən gələcək”.
