Minimum pensiya 240 manat olur
Milli Məclisin 24 dekabr iclasında “Əmək pensiyaları haqqında” qanuna dəyişiklik edilib. Novator.az bildirir ki, yeniliyə görə, 2022-ci il yanvarın 1-dən əmək pensiyasının minimum məbləği 240 manata yüksəlir.
2019-cu il oktyabrın 1-dən ölkədə minimum pensiya 200 manatdır.
Azərbaycanda kişilər 65, qadınlar 62 yaş yarımda pensiyaya çıxır. 2027-ci il iyulun 1-dək qadınların da pensiya yaşı 65-ə qalxacaq.
2021-ci il oktyabrın 1-nə Azərbaycanda 1 milyon 205,4 min nəfər pensiyaçı qeydə alınıb.
Pensiyaya çıxmaq üçün ya 25 il sığorta stajı, ya da minimum pensiya göstəricisinin gözlənən pensiya ödənişi müddətinin aylarının sayına (144) vurulmasından yaranan minimum pensiya kapitalı tələb olunur. Əks halda pensiya yaşı çatan şəxsə yaşa görə müavinət verilir. Yaşa görə müavinətin məbləği 130 manatdır, 2022-ci il yanvarın 1-dən 180 manata qalxacaq.
