Birdəfəlik ödəmədə yenilik
1997-ci il avqustun 2-də “Hərbi qulluqçuların dövlət icbari şəxsi sığortası haqqında” qanun qüvvəyə minib, həmin dövrdən sonra hərbi qulluqçuların həlak olması, itkin düşməsi və ya xəsarət alması zamanı sığorta ödənişlərinin verilməsi həyata keçirilib.
Prezident İlham Əliyevin 2018-ci il aprelin 19-da və 2019-cu il yanvarın 28-də imzaladığı fərmanlarla 1997-ci il avqust ayının 2-dək şəhid olmuş şəxslərin vərəsələrinə 11 min manat birdəfəlik ödəmə verilib. Əmək və Əhalinin Sosial Müdafiəsi Nazirliyi bildirir ki, 12,3 minə yaxın şəhidin 18 mindən çox vərəsəsi birdəfəlik ödəmə ilə təmin olunub.
Dövlət başçısının 23 dekabr 2021-ci il fərmanı ilə 1997-ci il avqustun 2-dək olan xidmət dövründə ölkənin ərazi bütövlüyü, müstəqilliyi və konstitusiya quruluşunun müdafiəsi ilə əlaqədar, hərbi xidmət vəzifələrini yerinə yetirərkən və ya hərbi xidmət dövründə xəsarət alması və ya xəstələnməsi nəticəsində əlilliyi müəyyən edilmiş hərbi qulluqçular və daxili işlər orqanları əməkdaşları, vəfat etmiş şəxslərin ailə üzvləri bu məbləğlərdə birdəfəlik ödəmə alacaqlar:
I dərəcə əlilliyə görə – 8800 manat;
II dərəcə əlilliyə görə – 6600 manat;
III dərəcə əlilliyə görə – 4400 manat.
Birdəfəlik ödəmənin 17-20 min şəxsi əhatə edəcəyi vurğulanır.
