Ən çox ziyarət olunan saytların siyahısı
ABŞ-ın “Cloudflare” şirkəti dünya əhlinin ən çox ziyarət etdiyi saytların siyahısını açıqlayıb.
Novator.az-ın məlumatına görə, 2021-ci ilin reytinq cədvəlinə TikTok.com liderlik edir. Bu sayt ötən ilin reytinqində yeddinci pillədə idi.
2020-ci ildə birinci yerdə olmuş Google.com bu il ikinci yerə keçib.
Ötən il ikinci yeri tutmuş Facebook.com builki reytinqdə üçüncüdür.
İlk onluqda digər yerləri Microsoft.com, Apple.com, Amazon.com, Netflix.com, YouTube.com, Twitter.com və Whatsapp.com saytları tutur.
2020-ci ilin reytinq cədvəlində doqquzuncu pillədə qərarlaşmış İnstagram.com saytı 2021-ci ildə ən çox ziyarət olunan saytların ilk onluğuna düşə bilməyib, amma populyar sosial şəbəkə saytları arasında beşinci olub. Bu reytinqdə birinci və ikinci yerlərdə yenə TikTok.com və Facebook.com gəlir.
İnternetdə ən çox ziyarət olunan video resurslarının reytinqinə isə ötən il olduğu kimi Netflix.com başçılıq edir. Sonrakı pillədə YouTube.com dayanır.
Ticarət platformalarının saytları arasında Amazon.com, messencerlərin saytları arasında WhatsApp.com liderliyini qoruyub saxlayır. Telegram.org ən çox ziyarət olunan messencer saytları siyahısında ikincidir.
Mənbə: Blog.cloudflare.com
