Obyektini itirən Bakı sakini Ali Məhkəmədən narazıdır
2021-ci ilin oktyabr ayında “Basta” saytına şikayət edən Bakı sakini Şövqi Həsənov bildirmişdi ki, onun mülk kağızlı obyektini – mağazasını razılığı olmadan söküblər. Onun sözlərinə görə, Dövlət Şəhərsalma və Arxitektura Komitəsinin araşdırması mülkiyyətində olan, Bakının Nəsimi rayonu, Mirqasımov küçəsi, 10 ünvanında yerləşən mənzili “Azadlıq Residence” MMC-nin mülkiyyətçinin razılığı olmadan sökdüyünü göstərib.
Şövqi Həsənov bildirmişdi ki, iş üzrə davamlı məhkəmə çəkişmələri aparıb.
Dekabrın 9-da yenidən “Basta”ya üz tutan Şövqi Həsənov qeyd edib ki, noyabrın 18-si Ali Məhkəmədə onun şikayəti üzrə növbəti prosesdə hakim Vüqar Həsənov “Azadlıq Residence” MMC-nin qanunu pozduğunu deyərək çəkişməni dekabrın 9-na təxirə salıb, tərəflərə bu müddət ərzində danışıb öz aralarında razılığa gəlməyi təklif edib: “Hakim dedi ki, bizim obyektimiz qanunsuz sökülüb. Nəhayət, ədalətli qərar gözləyirdik. Amma məhkəmə təxirə salındı və barışıq təklif olundu.
Qarşı tərəf bizə sökülən obyektə uyğun bir yer təklif etmədi. Dedilər ancaq 2-ci mərtəbədə 51 kvadratmetr yer verə bilərik. Halbuki mənə sökülən mağazamın müqabilində birinci mərtəbədən yer verilməlidir.
Razılığa gəlinmədiyi üçün məhkəmə qanunsuz qərarı ləğv etməli idi. Amma bütün sübutlar ortada olsa da, hakim Vüqar Həsənov Bakı Apellyasiya Məhkəməsinin qanunsuz qətnaməsini qüvvədə saxladı”.
Şikayətçi həm Konstitusiya Məhkəməsinə, həm də Avropa İnsan Hüquqları Məhkəməsinə müraciət edəcəyini bildirib.
