Almaniya parlamenti – Bundestaq dekabrın 8-də Sosial Demokrat Partiyasından Olaf Şoltsu kansler seçib.

Parlament idarə üsullu Almaniyada kansler hökumət başçısı sayılır.

Novator.az bildirir ki, ölkədə bu il sentyabrın 26-da keçirilmiş parlament seçkisində Sosial Demokrat Partiyası 206, Xristian Demokrat və Xristian Sosial ittifaqları alyansı 196, Yaşıllar Partiyası 118, Azad Demokrat Partiyası 92, Almaniya Üçün Alternativ Partiyası 83, Sol Partiya 39 mandat əldə edib, 1 mandat kiçik bölgə partiyasına düşüb.

Yeni hökuməti Sosial Demokrat Partiyası, Yaşıllar Partiyası, Azad Demokrat Partiyası qurub.

Olaf Şolts 1958-ci il iyunun 14-də doğulub. Hamburq Universitetini bitirib. Hüquqşünasdır.

Sosial Demokrat Partiyasına 1975-ci ildə qoşulub. Partiyanın “Gənc sosialistlər” təşkilatının sədr müavini, Beynəlxalq Sosialist Gənclər İttifaqının vitse-prezidenti, partiyanın Hamburq təşkilatının rəhbəri, baş katibi, sədr müavini olub.

Bir neçə dəfə Bundestaqın üzvü seçilib. Hamburq hökumətində daxili işlər naziri, Hamburqun baş naziri, Almaniya hökumətində əmək və sosial məsələlər naziri vəzifələrini tutub.

2018-ci ilin martından Almaniyanın vitse-kansleri və maliyyə naziri postunda çalışıb.