Aydın itki
1956-cı il təvəllüdlü tarix elmləri doktoru, Azərbaycan Milli Elmlər Akademiyasının Arxeologiya, Etnoqrafiya və Antropologiya İnstitutunun aparıcı elmi işçısı Aydın Balayev dekabrın 8-də vəfat edib.
Azərbaycan Xalq Partiyasının sədri Pənah Hüseyn yazır: “Azərbaycan xalqının milli mücadilə tarixinin görkəmli tədqiqatçısı, milli tarix şüurumuzun formalaşmasında əvəzsiz xidməti olan, elmi monoqrafiyaların, məqalələrin müəllifi, sözün həqiqi mənasında intellektual və ziyalı Aydın Balayevin vəfatı Azərbaycan elminə, dostlarına, tam mənası ilə bütün millətimizə ağır itkidir.
Aydınla universitetdə bir kursda oxumuşam, Moskvada aspirantura dövründə bir yerdə olmuşuq. Elə Moskvada da Aydın məni o vaxt uzunmüddətli elmi məzuniyyətlə əlaqədar SSRİ Elmlər Akademiyası əməkdaşları üçün tikilmiş şəhərcikdə qalan Əbülfəz Elçibəylə tanış edib…
Bu qaşqabaqlı, ağır xasiyyətli bakılının, hər şeyə münasibətdə ölümünə prinsipial insanın daxilində qəribə yaxşı adam, isti dost vardı.
İndi hansısa ideya, layihə müzakirə edəndə məsləhət və iştirak üçün ilk adı çəkilənlərdən olan Aydının adını çəkə bilməyəciyimi təsəvvür etmək çətindir”.
Müsavat Partiyasının başqanı Arif Hacılı Aydın Balayevin Azərbaycan Xalq Cümhuriyyəti tarixinin və Məhəmməd Əmin Rəsulzadə irsinin görkəmli araşdırıcısı, böyük ziyalı olduğunu vurğulayır, onun vəfatının Azərbaycan üçün böyük itki olduğunu yazır.
Jurnalist, filologiya elmləri doktoru Qulu Məhərrəmli qeyd edir ki, həqiqi alim və peşəkar tədqiqatçı olan Aydın Balayev etnososiologiya, etnik sosiolinqvistika, eləcə də XIX əsrin sonu və XX əsrin başlanğıcında Azərbaycanda milli hərəkatın təşəkkülü və milli kimliyin formalaşması proseslərinin tədqiqinə dair 15-dən artıq kitabın müəllifi idi.
