Büdcə zərfi qəbul olundu
Milli Məclisin 3 dekabr iclasında 2022-ci ilin büdcə zərfi üçüncü – son oxunuşda qəbul edilib.
Novator.az bildirir ki, dövlət büdcəsi layihəsində 26,8 milyard manat gəlir, 29,8 milyard manat xərc rəsmiləşir.
Dövlət Neft Fondundan büdcəyə 12,7 milyard manat köçürmə, Dövlət Vergi Xidmətindən 8,8 milyard manat, Dövlət Gömrük Komitəsindən 4,2 milyard manat daxilolma nəzərdə tutulur. Büdcədənkənar gəlirlər 760 milyon manat, digər daxilolmalar 260 milyon manat proqnozlaşdırılır.
İqtisadi fəaliyyətə 5,9 milyard manat, müdafiə və milli təhlükəsizliyə 4,4 milyard manat, ümumi dövlət xidmətlərinə 4,2 milyard manat, təhsilə 3,8 milyard manat, sosial müdafiə və sosial təminata 3,5 milyard manat ayrılır.
Başqa xərc istiqamətləri belə sıralanır: məhkəmə hakimiyyəti, hüquq mühafizə və prokurorluq – 2,3 milyard manat; səhiyyə – 1,7 milyard manat; kənd təsərrüfatı – 997,3 milyon manat; mədəniyyət, incəsənət, informasiya, bədən tərbiyəsi, gənclər siyasəti və bu qəbildən olan digər fəaliyyət – 458,7 milyon manat; ətraf mühitin mühafizəsi – 285,8 milyon manat; mənzil və kommunal təsərrüfatı – 261,4 milyon manat.
Əsas bölmələrə aid edilməyən xərclər 1,5 milyard manat göstərilir.
Dövlət Sosial Müdafiə Fondunun büdcə layihəsində gəlirlər və xərclər 5 milyard 306,7 milyon manat, işsizlikdən sığorta fondunun büdcə layihəsində 180,3 milyon manatdır.
2022-ci il üçün yaşayış minimumu 210 manat, ünvanlı dövlət sosial yardımının təyin edilməsi məqsədilə ehtiyac meyarının həddi 200 manat məbləğində təsdiqlənir.
