Hüquqşünas nazirdən kömək istəyir
Hüquqşünas Ənnağı Hacıbəyli ədliyyə naziri Fikrət Məmmədova müraciət edib. Novator.az-ın məlumatına görə, hüquqşünas yazır ki, hüquqi xidmət göstərdiyi, ona borclu qalmış vətəndaş Rüstəmov Arif Kamil oğluna qarşı iddiası bir neçə il məhkəmələrdə gəzib: “Suraxanı Rayon Məhkəməsi bir il yarım süründürüb iddiamı qismən təmin etmişdi. Nəhayət, Bakı Apellyasiya Məhkəməsi iddianı demək olar tam təmin edib, icra vərəqəsi Suraxanı Rayon İcra Şöbəsinə göndərilib. Bir neçə aydan sonra, bu il noyabrın 12-də həmin şöbədən mənə icra işinin xitam olunması barədə imzasız və möhürsüz, qoşmada göstərilən sənədlər əlavə olunmadan bir cavab göndəriblər. Qərarda göstərilir ki, Aydəmirov Həmid Heydər oğlu vəfat etdiyi üçün 14 iyun 2021-ci il tarixli icra sənədinə xitam verilir.
Mülki işdə cəmi bir nəfər (Arif Rüstəmov) cavabdeh göstərildiyi halda mərhum Aydəmirovun bu işə nə aidiyyəti olduğu bəlli deyil. İş ətrafında son bir neçə il ərzində baş verənlər onu deməyə əsas verir ki, bu, texniki səhv deyil, çoxlu sayda havadarı olan borclunu məsuliyyətdən kənarda qoymaqdır.
Xahiş edirəm Ədliyyə Nazirliyinin İcra Baş İdarəsinə bu işin araşdırılması, qanuni qüvvəyə minmiş məhkəmə qərarının icra edilməsi və təqsirkar şəxslərin cəzalandırılması barədə göstəriş verəsiniz”.
1955-ci il təvəllüdlü Ənnağı Hacıbəyli Bakı Dövlət Universitetinin hüquq fakültəsini bitirib. Respublika Prokurorluğunda şöbə rəisi, Ədliyyə Nazirliyində idarə rəisi olub. Azərbaycan Hüquqşünaslar Assosiasiyasının qurucusu, hüquq müdafiəçisi, ictimai xadimdir.
