Sosial təminat hesabatı
Əmək və Əhalinin Sosial Müdafiəsi Nazirliyinin hesabatına görə, 2021-ci ilin yanvar-sentyabr aylarında Azərbaycanda pensiya və müavinətlərə yönəldilmiş vəsaitin məbləği 3 milyard 566 milyon manat olub.
Oktyabrın 1-nə pensiyaçıların sayı 1 milyon 201,3 min nəfər, pensiyaların orta məbləği 330,6 manat göstərilib.
Rəsmi açıqlamaya əsasən, aylıq müavinət alanların sayı belədir: yaşa görə – 111,9 min nəfər, 18 yaşından yuxarı əlilliyi olan şəxslərə əlilliyə görə – 153,7 min nəfər, ailə başçısını itirməyə görə – 48,9 min nəfər, sağlamlıq imkanları məhdud olduğuna görə müavinət alan 18 yaşınadək uşaqlar – 55,2 min nəfər, digər müavinət növlərini alanlar – 22,9 min nəfər.
Həmçinin qeyd olunur ki, valideynlərini itirmiş və valideyn himayəsindən məhrum olmuş uşaqların 225 nəfər qəyyumuna aylıq müavinət verilib, şəhid ailələrinin, müharibə və ya 1990-cı ilin 20 yanvar hadisələri ilə əlaqədar əlilliyi olan şəxslərin, Çernobıl qəzası nəticəsində I və II dərəcə əlilliyi müəyyən edilmiş, yaxud vəfat etmiş şəxslərin, habelə Çernobıl qəzası nəticələrinin aradan qaldırılması iştirakçılarının və müddətli hərbi xidmət qulluqçularının 6,9 min ailəsi 11,1 min uşaq üçün aylıq müavinət alıb.
1255 nəfər bir yaşınadək uşağı olan 1224 aztəminatlı ailəyə və beşdən çox uşağı olan 2,4 min qadına 9,3 min uşaq üçün sosial müavinət, əmək xəsarəti və ya peşə xəstəliyi nəticəsində zərərçəkən 325 şəxsə kompensasiya verildiyi vurğulanır: “48,8 min ailə 49,8 min uşağın anadan olmasına görə, radiasiya qəzası nəticəsində zərər çəkmiş 4 min şəxs müalicə üçün və penitensiar müəssisələrdə cəza çəkməkdən azad edilmiş 4,7 min nəfər birdəfəlik müavinət alıb.
52,5 min aztəminatlı ailənin 225,8 min üzvünə ünvanlı dövlət sosial yardımı verilib, 298,1 min şəxsə prezident təqaüdü təyin olunub”.
