Milli Dirçəliş Günündə
Əli Kərimli
AXCP sədri
33 il öncənin 17 noyabrında da gündəmimiz Qarabağ idi. Separatçıların Qarabağı Azərbaycandan qoparmaq cəhdləri, SSRİ rəhbərliyinin erməni separatizminə şərait yaratması, Azərbaycanın kommunist rəhbərliyinin cəsarətsizliyi, bacarıqsızlığı, öz kürsüsünü qorumaq üçün Moskva qarşısında itaətkarlığı xalqımızı hiddətləndirirdi. Nəhayət, Qarabağdakı Topxana meşəsinin qırılma xəbəri vətənpərvər gəncliyin səbir kasasını daşırdı. Tələbələrin “Yurd” birliyinin Bakı Dövlət Universitetindən başlatdığı yürüş Azadlıq meydanında böyük mitinqə çevrildi.
Qarabağ şüarı ilə meydana axışan insanlar 17 gün davam etmiş Meydan hərəkatının sayəsində ölkəmizdə milli dirçəlişin – xalqımızın kütləvi şəkildə öz taleyinə sahib çıxmasının əsasını qoydu. Meydan hərəkatı milli azadlıq hərəkatına çevrildi. Müstəqillik ideyası milyonların ideyası oldu. Cəmi 3 il ərzində Azərbaycan xalqı dünyada ilin xalqı oldu, sovet imperiyasına qarşı 20 Yanvar kütləvi dirənişinə müəlliflik etdi. Öz gücü ilə, yalın əllə Qarabağı düşməndən qorudu və digər sovet xalqları ilə birlikdə imperiyanı sarsıtdı. 17 noyabrdan başlayan milli azadlıq hərəkatı dövlət müstəqilliyimizin bərpası ilə nəticələndi.
Ötən il qəhrəman ordumuz işğal olunmuş torpaqlarımızın əksər hissəsini azad etməklə bizi milli dirçəlişimizin daha bir hədəfinə qismən çatdırdı. Təəssüf ki, hələlik qismən. Çünki hələ də torpaqlarımızın 4 faizi düşmən tapdağı altındadır. 33 il sonra – bu gün də Qarabağ hələ münaqişə mənbəyi olaraq qalır.
Milli dirçəlişimizin digər hədəfi olan demokratiya isə son illər ölkəmizdən daha da uzaqlaşır.
Hazırda hələ də yaşamaqda olduğumuz bütün çətinliklərə baxmayaraq Milli Dirçəliş Günündə inanıram ki, o böyük hərəkatın digər hədəflərinə də nail olacağıq. Azərbaycanın ərazi bütövlüyü həqiqətən də bərpa olunacaq, Rəsulzadə yurdunda cümhuriyyət ideyaları, demokratiya bərqərar olacaq!
