Azərbaycan Ordusu şəhidlər verib
Müdafiə Nazirliyinin rəsmi məlumatına görə, Ermənistanla dövlət sərhədindəki 16 noyabr döyüşləri zamanı Azərbaycan Ordusunun hərbi qulluqçuları şəhid olub: leytenant Niftəliyev Ümüd Oruc oğlu; gizir Cabbarov Orxan Hətəm oğlu; kiçik çavuş Əliyev Natiq Yusif oğlu; əsgər Ağayev Elçin Mərifət oğlu; əsgər Əlizadə Elmin Samir oğlu; əsgər Əliyev Elçin Ramil oğlu; əsgər Xəlilov Murad Qalib oğlu.
Nazirlik döyüşlərdə 10 nəfər hərbi qulluqçunun yaralandığını əlavə edir.
Ermənistan silahlı qüvvələri noyabrın 16-sı səhər saat 11 radələrində dövlət sərhədinin Kəlbəcər və Laçın rayonları sahəsində yüksəklikləri ələ keçirmək və daha əlverişli mövqelərə yiyələnmək məqsədilə hərbi əməliyyata başlayıb, döyüş postlarına hücum edib. Kəlbəcər və Laçın istiqamətində yerləşən birlik və qüvvələr cavab tədbirləri görüb.
Ermənistan 1988-1994-cü illərin təcavüzündə Azərbaycanın bütün cənub-qərbini işğal edib.
2020-ci il sentyabrın 27-dən Azərbaycanın apardığı hərbi əməliyyatlarda və noyabrın 10-na keçən gecə əldə edilən atəşkəs razılaşması nəticəsində Cəbrayıl, Füzuli, Zəngilan, Qubadlı, Ağdam, Kəlbəcər rayonları tam, Şuşa, Laçın, Xocavənd, Xocalı rayonları və keçmiş Ağdərə rayonu qismən azad olunub.
Azərbaycan hərbçiləri 2021-ci ilin may ayında Ermənistanla sərhədin Laçın rayonu istiqamətindəki Qaragöl sahəsini və Kəlbəcər istiqamətində bəzi əraziləri nəzarətə götürüb. Ermənistan bunu öz ərazisinə müdaxilə sayır.
