Makroiqtisadi hesabatdan
Dövlət Statistika Komitəsi makroiqtisadi göstəricilər açıqlayıb. Novator.az bildirir ki, hesabata görə, 2021-ci ilin yanvar-oktyabr aylarında kənd təsərrüfatının ümumi məhsulu əvvəlki ilin on ayı ilə müqayisədə 4,1 faiz çoxalıb, heyvandarlıq məhsulları istehsalında 2,7 faiz, bitkiçilik məhsulları istehsalında 5,4 faiz yüksəliş qeydə alınıb.
Nəqliyyat sektorunda yük daşınmasının 0,9 faiz artdığı, sərnişin daşınmasının 5,9 faiz azaldığı, informasiya və rabitə xidmətlərinin həcmində 5,6 faiz yüksəliş olduğu vurğulanır.
Rəsmi açıqlamaya əsasən, 2020-ci ilin on ayına nəzərən əhalinin gəlirləri nominal ifadədə 2,4 faiz artıb, dövlət büdcəsinə 20 milyard 234,2 milyon manat vəsait daxil olub, büdcədən 20 milyard 184,7 milyon manat vəsait xərclənib.
Oktyabrın 1-nə ölkənin bank və digər kredit təşkilatlarının kredit portfeli milli valyuta ekvivalentində 15 milyard 957,3 milyon manat, əhalinin banklardakı əmanətlərinin milli valyuta ekvivalentində məbləği 8 milyard 838,1 milyon manat göstərilib.
