ABŞ-da bir neçə günə 5-11 yaşlarında 90 min uşaq peyvənd olunub
Bu hətənin əvvəlindən ABŞ-da 5-11 yaşlı uşaqların koronavirus infeksiyası əleyhinə peyvəndlənməsi üzrə dövlət proqramının icrasına başlanıb.
Novator.az-ın məlumatına görə, Ağ evin COVİD-19-la bağlı koordinatoru Ceff Zients deyib ki, uşaqların vaksinasiyası çox sürətlə gedir.
Onun sözlərinə görə, artıq 5-11 yaşlarında 90 min uşaq peyvəndin ilk dozasını qəbul edib. Təxminən 70 min uşaq isə hazırda birinci dozanı vurdurmaq üçün növbədədir.
ABŞ-da 5-11 yaşlı uşaqların koronavirusa qarşı peyvəndlənməsinə qida məhsullarının və dərman preparatlarının keyfiyyətinə sanitar nəzarəti həyata keçirən administrasiya (FDA) ötən ay razılıq verib. Bundan dərhal sonra uşaqların vaksinasiyasına hazırlığa başlanıb.
Valideynlər uşaqlarını peyvənd etdirə biləcəkləri tibb məntəqələrinin ünvanlarını Xəstəliklərə Nəzarət və Profilaktika Mərkəzinin saytından öyrənirlər.
ABŞ-da 5-11 yaşlarında 28 milyon uşaq var.
Mənbə: Nbcnews.com
