Yarımçıq olmasın
Parlament Vergi Məcəlləsinə dəyişikliklər etməyə hazırlaşır. Nəzərdə tutulan bir yenilik də hibrid (həm benzin, həm də elektriklə işləyən) avtomobillərə vergi güzəştidir. İstehsal tarixi 3 ildən və mühərrikinin həcmi 2500 kubsantimetrdən çox olmayan hibrid avtomobillərin idxalı və ölkədə satışı 2022-ci il yanvarın 1-dən 3 il müddətinə əlavə dəyər vergisindən (ƏDV) azad ediləcək.
İdxalda və daxili bazarda satışda ƏDV güzəşti elektromobillərə də aid olunur.
Novator.az-ın məlumatına görə, iqtisadçı, müxalif REAL Partiyasının funksioneri Natiq Cəfərli təşəbbüsə belə münasibət bildirib: “Uzun illərdir bu məsələni gündəmə gətirirdik, nəhayət, hökumət tərpənmək istəyir, amma verən əlləri yoxdur, yaxşı qərarlara əlləri əsə-əsə imza atırlar. Hibrid və elektriklə çalışan avtomobillərə ƏDV güzəşti əla xəbərdir, amma bunun istehsalı 3 il olan maşınlarla məhdudlaşması doğru deyil. ƏDV güzəşti heç olmasa 2015-ci ildə və daha sonra istehsal olunan avtomobillərə də şamil edilməlidir. Bu, tək ekoloji məsələ deyil, həm də insanların təhlükəsizliyi məsələsidir – müasir avtomobillər qəzalarda daha çox qoruyur. ABŞ və Avropa bazarlarında 2015-ci ilin istehsalı olan müasir hibrid avtomobili 5-6 min dollara almaq mümkündür. Yetərli vergi güzəştinin tətbiqi ölkənin avtoparkının yenilənməsi, müasirləşməsi, təhlükəsizliyi demək olar”.
