Bloqçu və ictimai fəal həbsdən buraxılıblar
Bloqçu Elçin Həsənzadə və ictimai fəal İbrahim Salamov (Türksoy) noyabrın 2-də həbsdən buraxılıblar. Onların cəza müddəti baş çatıb.
Şəki Apellyasiya Məhkəməsi Elçin Həsənzadəni və İbrahim Salamovu bu il martın 2-də 8 ay müddətinə azadlıqdan məhrum etmiş, onlar məhkəmə zalında həbs olunmuşdular.
Hər iki şəxsi Mingəçevir Şəhər Mənzil Kommunal Təsərrüfatı İstehsalat Birliyinin rəisi Şəhriyar Mustafayev məhkəməyə verib. Şəhriyar Mustafayev Mingəçevir Şəhər Məhkəməsinə xüsusi ittiham qaydasında şikayətində bloqçunun və ictimai fəalın “Facebook”da onu böhtana və təhqirə məruz qoyduğunu iddia edib.
İdarə rəisinin iddiasına 2020-ci ilin noyabrında Mingəçevir Şəhər Məhkəməsində baxılmış və Elçin Həsənzadə ilə İbrahim Salamovun hər biri 1 il islah işlərinə məhkum edilmişdi. Şəhriyar Mustafayev hökmdən narazı qalmış və onların cəzasının ağırlaşdırılması üçün apellyasiya şikayəti vermişdi.
