Obyekti sökülən paytaxt sakini ədalət gözləyir
“Azərbaycanda məhkəmə-hüquq sistemində islahatlardan çox danışılır, amma mən pozulan hüququmu məhkəmə yolu ilə bərpa edə bilmirəm”. Bunu “Basta” saytına şikayətində Bakı şəhər sakini Şövqi Fikrət oğlu Həsənov deyir.
Şövqi Həsənov bildirir ki, onun mülk kağızlı obyektini – mağazasını razılığı olmadan söküblər, orada olan dəyərli əşyalar isə talan edilib.
Şikayətçi qeyd edir ki, Dövlət Şəhərsalma və Arxitektura Komitəsinin araşdırması mülkiyyətində olan, Bakının Nəsimi rayonu, Mirqasımov küçəsi, 10 ünvanında yerləşən mənzili “Azadlıq Residence” MMC-nin mülkiyyətçinin razılığı olmadan sökdüyünü göstərib. Komitənin 14 mart 2019-cu il sənədində qeyd olunur ki, Nazirlər Kabinetinin 25 fevral 2016-cı il qərarının tələbləri yerinə yetirilmədən, mülkiyyətçinin razılığı olmadan mənzilinin sökülməsi nəticəsində onun konstitusiya ilə təsbit olunmuş mülkiyyət hüquqları pozulub.
Şövqi Həsənov bildirir ki, iş üzrə məhkəmə qərarları da var: “Mənim şikayətim əsasında Bakı Apellyasiya Məhkəməsinin 16 aprel 2019-cu il qətnaməsi ilə Nəsimi Rayon Məhkəməsinin qətnaməsi ləğv edilərək mülkiyyət hüquqlarım qorunub. Ali Məhkəmənin 30 oktyabr 2019-cu il qərarı ilə Bakı Apellyasiya Məhkəməsinin həmin qətnaməsi qüvvədə qalıb və mənim mülkiyyət hüququm qorunub. Bütün bunlara baxmayaraq “Azadlıq Residence” məhkəmə qərarlarını icra etməyib”.
Şövqi Həsənov bildirir ki, noyabrın 18-də Ali Məhkəmədə onun şikayəti üzrə növbəti proses keçiriləcək.
