İşığın yeni qiyməti: kimə nə yük düşür?
Noyabrın 1-dən Azərbaycanda elektrik enerjisinin tarifləri artır. İndi əhalinin ayda 300 kilovat-saatadək (300 kilovat-saat daxil) elektrik enerjisi işlədən hissəsi hər kilovat-saata görə 7 qəpik, 300 kilovat-saatdan çox elektrik enerjisi işlədən hissəsi hər kilovat-saata görə 11 qəpik ödəyir.
Noyabrın 1-dən əhalinin ayda 200 kilovat-saatadək (200 kilovat-saat daxil) elektrik enerjisi işlədən hissəsi hər kilovat-saata görə 8 qəpik, 200 kilovat-saatdan 300 kilovat-saatadək (300 kilovat-saat daxil) elektrik enerjisi işlədən hissəsi hər kilovat-saata görə 9 qəpik, 300 kilovat-saatdan çox elektrik enerjisi işlədən hissəsi hər kilovat-saata görə 13 qəpik ödəyəcək.
Yeni qiymətlərin əhaliyə mümkün təsirini araşdıran iqtisadçı Samir Əliyev özünün “Facebook” səhifəsində bu ilin yanvar ayında keçirdiyi sorğunun nəticələrini açıqlayıb. Novator.az-ın məlumatına görə, ekspert yazır ki, 161 nəfərin qatıldığı sorğuda ailələrin aylıq elektrik enerji istehlakı barədə sual belə cavablandırılıb:
100 kilovat-saata qədər – 5%
101-200 kilovat-saat – 26%
201-300 kilovat-saat – 29%
301-400 kilovat-saat – 20%
401-500 kilovat-saat – 9%
500 kilovat-saatdan çox – 11%.
Ekspert cavablara əsaslanaraq qeyd edir ki, son artıma qədər respondentlərin 60%-nin aylıq sərfi güzəşt limiti (300 kilovat-saata qədər) daxilində olub: “Dəyişiklik nəticəsində respondentlərin 31%-i ən aşağı tarif qrupunda (200 kilovat-saatadək) cəmləşir. Onların aylıq elektrik enerjisi xərcləri 14,3% artır. İndi ayda maksimum 14 manat işıq pulu ödəyirlər, noyabrın 1-dən 16 manat ödəyəcəklər.
Yeni tarif nəticəsində 29% respondent ən aşağı tarifdən orta tarif qrupuna keçir. Onların elektrik xərcləri 19,1% artır. İndi onlar ayda maksimum 21 manat pul ödəyirlər, noyabrın 1-dən 25 manat ödəyəcəklər.
Yerdə qalan 40% respondentin xərcləri daha çox artacaq. Məsələn, ayda 400 kilovat-saata qədər işıq işlədən 20% respondentin xərcləri 18,8%, 500 kilovat-saata qədər işıq işlədən 9% respondentin xərcləri 18,6% artır”.
