Deputatın işi məhkəməyə getdi
Baş Prokurorluğun 22 oktyabr məlumatına görə, İstintaq İdarəsi Milli Məclisin deputatı Eldəniz Səlimovun cinayət işinin ibtidai istintaqını tamamlayıb. Qeyd olunur ki, deputat bu il iyulun 29-da Xaçmaz şəhərində, qohumuna məxsus “Starıy Dvor” restoranında yerli polis şöbəsinin qeydiyyat və şəxsiyyət vəsiqəsi qrupunun inspektoru, leytenant Zaur Mirzəyevin ünvanına nalayiq ifadələr işlədib, onun sifət və baş nahiyəsinə yumruq və başı ilə xəsarətlər yetirib. Deputatın bu addımı hadisədən bir neçə gün öncə Zaur Mirzəyevin restoranda xüsusi karantin rejimi qaydalarının pozulması ilə əlaqədar qanuna müvafiq hərəkətlərini özünə hörmətsizlik kimi qiymətləndirərək atdığı bildirilir.
Eldəniz Səlimov zor tətbiq etməklə vəzifə səlahiyyətlərini aşmada ittiham olunur. Cinayət işi baxılması üçün Sumqayıt Ağır Cinayətlər Məhkəməsinə göndərilib.
Novator.az bildirir ki, 1976-cı il təvəllüdlü Eldəniz Səlimov 2015 və 2020-ci illərdə prezident İlham Əliyevin sədrlik etdiyi Yeni Azərbaycan Partiyasının namizədi kimi 55 saylı Xaçmaz şəhər seçki dairəsindən Milli Məclisə mandat alıb.
Bu il avqustun 2-də Eldəniz Səlimov Yeni Azərbaycan Partiyasının üzvlüyündən çıxarılıb. Qərarı Xaçmaz rayon təşkilatının İdarə Heyəti qəbul edib.
Avqustun 3-də Milli Məclis Eldəniz Səlimovun deputat toxunulmazlığına xitam verib. Həmin gün deputat Bakıda tutulub, Binəqədi Rayon Məhkəməsi onun barəsində həbs qətimkan tədbiri seçib.
Zor tətbiq etməklə vəzifə səlahiyyətlərini aşma 3 ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə 3 ildən 8 ilədək müddətə azadlıqdan məhrumetmə ilə cəzalandırılır.
Eldəniz Səlimov üzr istəyir və…
Eldəniz Səlimovun toxunulmazlığına xitam verildi
