Avropa saatı tutuşdura bilmir
Avropa İttifaqı yay-qış vaxtının tətbiqindən imtinanı təxirə salmağa məhkum olub.
Novator.az bildirir ki, 1996-cı ildən ittifaqda martın son bazar günündən əqrəblərin bir saat qabağa çəkilməsi ilə yay vaxtına keçilir, oktyabrın son bazar günündən əqrəblərin bir saat geri çəkilməsi ilə qış vaxtı tətbiq olunur. 2019-cu il martın 26-da ittifaqın qanunverici orqanı – Avropa Parlamenti yay-qış vaxtına keçidin ləğvinə səs verib. Qərara görə, 2021-ci ildən saatın irəli-geri çəkilməsi dayandırılmalı, yay və ya qış vaxtında qalmağı ittifaqın hər ölkəsi özü müəyyənləşdirməli idi.
Avropa İttifaqının 27 üzvü var: Almaniya, Avstriya, Belçika, Bolqarıstan, Çexiya, Danimarka, Estoniya, Finlandiya, Fransa, Xorvatiya, İrlandiya, İspaniya, İsveç, İtaliya, Kipr, Latviya, Litva, Lüksemburq, Macarıstan, Malta, Niderland, Polşa, Portuqaliya, Rumıniya, Slovakiya, Sloveniya, Yunanıstan.
Strana.today saytının məlumatına görə, ittifaq ölkələri saat məsələsində vahid fikrə gələ bilməyib. Bəzi ölkələr (məsələn, Almaniya, Fransa) yaz vaxtında, bəziləri (məsələn, Niderland, Belçika) qış vaxtında qalmağa üstünlük veriblər. Ənənəni saxlamağa, yəni saatı irəli-geri çəkməyə tərəfdar olanlar da var (məsələn, Litva, Avstriya, Çexiya, Portuqaliya, Yunanıstan).
2021-ci il martın 28-dən Avropa İttifaqı yay vaxtındadır. Oktyabrın 31-dən bu məkanda qış vaxtına keçiləcək.
Avropada sabit saatla yaşayan bir ölkə var: İslandiya.
Azərbaycan hökuməti saatın irəli-geri çəkilməsi qaydasını 2016-cı ilin martında ləğv edib.
Keçmiş SSRİ məkanında Rusiya, Belarus, Gürcüstan, Ermənistan, Qazaxıstan, Qırğızıstan, Tacikistan, Türkmənistan, Özbəkistan da saatı irəli-geri çəkmir.
