İşsizlik və yoxsulluq zolağı
İqtisadçı, Azərbaycan Demokratiya və Rifah Partiyasının sədri Qubad İbadoğlu rəsmi məlumatlara əsaslanaraq bildirir ki, 2020-ci ildə işsizlik 2003-ildən, yoxsulluq 2011-ci ildən bəri ən yüksək səviyyədə olub, işsizlik 50 faizə, yoxsulluq 30 faizə qədər artıb.
Novator.az-ın məlumatına görə, Qubad İbadoğlu 2020-ci ildə Azərbaycanda rəsmən 376 min nəfər işsizin qeydə alındığını yazır: “Bu, 2019-cu illə müqayisədə 125 min nəfər və ya 50 faiz çoxdur. Beləliklə, işsizlik səviyyəsi 2003-cü ildən sonra ən yüksək həddə çatıb. Müstəqil ekspertlər 2020-ci il üçün işsizlik faizinin rəsmi göstərildiyi kimi 4,8 faiz deyil, 16,5 faiz olduğunu iddia edirlər.
2019-cu ildə ölkə əhalisinin 4,8 faizi yoxsulluq səviyyəsindən aşağı yaşadığı halda 2020-ci ildə bu göstərici 6,2 faizə yüksəlib. Bu o deməkdir ki, 2020-ci il ərzində yoxsulların sayı 30 faizə yaxın artıb. Beləliklə, Azərbaycanda yoxsulluq səviyyəsi 2011-ci ildən sonra ən yüksək həddə qalxıb.
Müstəqilliyin 30 ili başa çatsa da, yenə yoxsulluq və işsizlik başlıca sosial problemə çevrilib. Dünya Bankının son tədqiqatına görə, 2016-cı ildə Azərbaycanda yoxsulluğun səviyyəsi kənd yerlərində yaşayanlar arasında 30 faiz, Bakıda yaşayanlar arasında 16 faiz, ölkə üzrə orta göstərici 16 faiz olub”.
