Elektron icra və notariat sistemləri
Nazirlər Kabineti “Elektron icra” informasiya sistemi haqqında əsasnaməni təsdiqləyib. Əsasnaməyə görə, fəaliyyətinin təşkili Ədliyyə Nazirliyinə tapşırılan informasiya sisteminin məqsədi icra sənədlərinin və icra hərəkətlərinin elektron məlumat bazasının yaradılması, icra mexanizmlərinin təkmilləşdirilməsi, icra fəaliyyətində keyfiyyətin və çevikliyin artırılması, fiziki və hüquqi şəxslərə keyfiyyətli xidmətlərin göstərilməsi və onlar üçün informasiyanın əlçatanlığının təmin edilməsidir.
Sistemin fəaliyyətinin əsas prinsipləri belə sıralanır: informasiyanın vahid məlumat bazasında toplanması, emalı, axtarışı, təhlili və ötürülməsi; informasiya sisteminə daxil edilən məlumatların dəqiqliyinin, tamlığının və etibarlılığının təmin edilməsi; informasiya sisteminin fasiləsiz fəaliyyətinin təmin edilməsi; kağız daşıyıcılardakı icra işləri haqqında məlumatların təhrif olunmasının və onların saxtalaşdırılmasının qarşısının alınması; informasiya sistemindən eyni zamanda çoxsaylı istifadənin mümkünlüyü; təhlükəsizliyin və məlumatların mühafizəsinin təmin edilməsi; informasiya mübadiləsində bir-biri ilə uzlaşa bilən texnologiyaların və proqram-texniki vasitələrin tətbiq edilməsi; məlumat mübadiləsi və sənəd dövriyyəsinin təşkil edilməsi.
Nazirlər Kabineti “Elektron notariat” informasiya sistemi haqqında əsasnaməni də rəsmiləşdirib. Sənədə görə, informasiya sisteminin fəaliyyətinin təşkili Ədliyyə Nazirliyinin səlahiyyətindədir. Sistemin məqsədinin notariat hərəkətlərinin elektron məlumat bazasının yaradılması, fiziki və hüquqi şəxslərə daha çevik və keyfiyyətli hüquqi xidmətlərin göstərilməsi, dövlət informasiya ehtiyatlarında olan sənədləri aidiyyəti sistemlərdən əldə etməklə tələb edilən rəsmi sənəd və arayışların sayının azaldılması və bununla da həmin qurumlara müraciət edilməsi zərurətinin aradan qaldırılması olduğu vurğulanır.
