Vətən müharibəsi şəhidlərinin sayı dəyişdi
2020-ci ilin Vətən müharibəsində itkin düşmüş gizir Əliyev İxtiyar İlqar oğlunun meyiti tapılıb. Baş Prokurorluq oktyabrın 13-də belə xəbər yayıb.
Novator.az bildirir ki, bununla Vətən müharibəsində şəhid olan hərbi qulluqçuların sayı 2908-ə yüksəlir, itkin hərbi qulluqçuların sayı 6-ya düşür.
1994-cü il təvəllüdlü gizir İxtiyar Əliyevin adı indiyə qədər itkinlərin siyahısında yer alırdı.
İtkin düşən 6 hərbi qulluqçu bunlardır: 2001-ci il təvəllüdlü əsgər Mehdiyev Asim Yaqub oğlu, 1998-ci il təvəllüdlü leytenant Vəlizadə İbrahim Səməd oğlu, 1997-ci il təvəllüdlü əsgər Qədirli Elnur Rəcəb oğlu, 1996-cı il təvəllüdlü əsgər Salamov Qorxmaz Bayram oğlu, 1995-ci il təvəllüdlü əsgər Feyzullayev Aydın Zakir oğlu, 1991-ci il təvəllüdlü əsgər Səfərli Xəqani İlqar oğlu.
Ermənistan 1988-1994-cü illərin təcavüzündə Azərbaycanın bütün cənub-qərbini ələ keçirib.
2020-ci il sentyabrın 27-dən Azərbaycanın apardığı hərbi əməliyyatlarda və noyabrın 10-na keçən gecə əldə edilən atəşkəs razılaşması nəticəsində Cəbrayıl, Füzuli, Zəngilan, Qubadlı, Ağdam, Kəlbəcər rayonları tam, Şuşa, Laçın, Xocavənd, Xocalı rayonları və keçmiş Ağdərə rayonu qismən azad olunub.
