Rusiyada etimad sorğusunun nəticələri
Rusiyada əhali ən çox orduya etimad göstərir. Novator.az-ın məlumatına görə, bunu “Levada” sorğu mərkəzinin keçirdiyi sosioloji sorğu təsdiqləyib.
Sorğu Rusiyanın 50 bölgəsinin 137 yaşayış məntəqəsində, yaşı 18-dən yuxarı olan 1619 nəfər arasında aparılıb.
Avqustun 19-26-da keçirilən sorğunun nəticələri oktyabrın 6-da açıqlanıb.
Nəticələrə görə, respondentlərin 63%-i orduya etimadla yanaşır.
Digər dövlət qurumları arasında respondentlərin ən çox etimad göstərdiyi xüsusi xidmət orqanlarıdır: 45%.
Kilsə və dini təşkilatlara etimad 40%, xeyriyyə təşkilatlarına etimad 36% həddindədir.
“Levada”nın avqust sorğusu zamanı respondetlərin 33%-i hökumətə, 25%-i Federasiya Şurasına, 25%-i Dövlət Dumasına, 20%-i həmkarlar ittifaqlarına, 18%-i iri biznes şirkətlərinə, 17%-i siyasi partiyalara etimadla yanaşdığını bildirib.
Prezident Vladimir Putinə etmad 53% həddində olub.
Sosioloqlar Rusiyada əhalinin dövlət qurumlarına, ictimai-siyasi institutlara etimadının əvvəlki illərlə müqayisədə bir qədər azaldığını deyirlər.
2017-ci ildə “Levada”nın sorğuları zamanı respondentlərin 69%-i orduya, 57%-i xüsusi xidmət orqanlarına, 35%-i hökumətə, 33%-i Dövlət Dumasına, 18%-i siyasi partiyalara etimadla yanaşmışdı.
Həmin il prezident Vladimir Putinə etmad da indikindən artıq olmuşdu: 75%.
Kütləvi informasiya vasitələrinə gəlincə, son 5 ildə Rusiyada onlara etimad artıb. Hazırda respondentlərin 36%-i KİV-ə etimadla yanaşır. 2016-cı ildə isə bu göstərici 27% idi.
Mənbə: Levada.ru
