Tərtər və Bərdə səfəri
Prezident İlham Əliyev oktyabrın 3-də Tərtər və Bərdə rayonlarına səfər edib. AZƏRTAC xəbər verir ki, dövlət başçısı Tərtərin Suqovuşan qəsəbəsinə və Talış kəndinə gedən avtomobil yollarının açılışını edib, Talış-Tapqaraqoyunlu-Qaşaltı-Naftalan avtomobil yolunun təməlini qoyub.
Talış kəndində və Suqovuşan qəsəbəsində Azərbaycan bayrağını ucaldan prezident Talış kəndində ermənilərin dağıtdığı alban-udi və pravoslav kilsələrinə baş çəkib.
İlham Əliyev “Suqovuşan-1” və “Suqovuşan-2” Kiçik Su Elektrik stansiyalarının yenidənqurmadan sonra açılışını edib, 2020-ci ilin Vətən müharibəsi zamanı Ermənistan silahlı qüvvələrinin “Smerç” raketləri ilə hücumu nəticəsində Tərtər şəhərinin sakini Sahib İsmayılovun dağılmış evinə baxıb və onun yerinə inşa edilən yeni evdə yaradılan şəraitlə tanış olub, rayon mərkəzində rayona müxtəlif tipli reaktiv yaylım atəşi sistemləri və artilleriya qurğularından atılmış mərmilərə baxıb.
Bərdədə İlham Əliyev Peşə Liseyinin açılışında iştirak edib.
Yuxarı Qarabağ bölgəsindəki Suqovuşan (əvvəlki adı Madagiz) və Talış kəndləri 2020-ci ilin Vətən müharibəsində erməni işğalından azad edilib. Bu kəndlər 1992-ci ildə Ağdərə rayonu ləğv olunanda Tərtərin tərkibinə verilib.
