Tofiq Yaqublu: “Bu nə səhlənkarlıqdır?”
Siyasətçi Tofiq Yaqublu səhiyyə sisteminin ləngliyindən gileylənib. Novator.az-ın məlumatına görə, o, oktyabrın 1-də özünün “Facebook” səhifəsində yazır ki, koronavirus infeksiyasına qarşı peyvənd kampaniyasının lehinədir və hər kəsi peyvənd vurdurmağa təşviq edir: “Mənim aid olduğum yaş qrupuna (Tofiq Yaqublu 1961-ci ildə doğulub – red.) peyvənd vurulmasına başlandıqda dərhal növbəyə yazılıb elə ilk gündə birinci doza, 4 həftə sonra ikinci doza peyvənd vurdurmuşam. İkinci dozanın 6 ayı tamam olan kimi üçüncü dozanı da aldım.
Sentyabrın 27-də hərarətim qalxdı və titrətdim. Əlamətləri oxşar olsa da, koronavirusa yoluxmadığıma tam əmin idim, amma yaxınlarımın təkidi ilə Səhiyyə Nazirliyinin 814 saylı qaynar xəttinə zəng etdik ki, gəlib test üçün yaxma götürsünlər. Dedilər ki, bu gün alınmır, ertəsi günü səhər gəlib yaxma götürəcəklər. Əslində həmin günlər koronavirusa yoluxmaların sayı xeyli azalmışdı və səhiyyə sisteminin yüklənməsi mümkün deyildi.
Sentyabrın 28-də heç kəs gəlmədi. Axşama yaxın bir də zəng etdik. Dedilər ki, sabah səhər saat 10-dək gələcəklər.
Artıq oktyabr ayının 1-dir, ilk zəngdən 4 gün keçir, amma heç kəs gəlib maraqlanmayıb. Bu nə sistemdir, nə səhlənkarlıqdır?”
2019-cu ilin dekabr ayında Çində üzə çıxaraq dünyanı bürüyən koronavirus infeksiyasına Azərbaycanda ilk yoluxma 2020-ci il fevralın 28-də qeydə alınıb, indiyədək 483902 nəfər koronavirusa infeksiyasına yoluxub, onların 6525-i vəfat edib.
2021-ci il yanvarın 18-dən Azərbaycanda koronavirus infeksiyasına qarşı vaksinasiya gedir. Son bilgiyə əsasən, 3 milyon 792 mindən çox şəxs peyvəndlənmə prosesini bitirib.
