Cəzadan qurtuluş: Konstitusiya Məhkəməsi rəy verib
Gəncə Apellyasiya Məhkəməsinin müraciətini əsas götürən Konstitusiya Məhkəməsinin Plenumu Cinayət Məcəlləsinin 74-cü maddəsini və Cinayət-Prosessual Məcəlləsinin 39, 40, 305.1-ci maddələrini əlaqəli şəkildə şərh edib.
Novator.az bildirir ki, Cinayət Məcəlləsinin 74-cü maddəsinə görə, şəraitin dəyişməsi nəticəsində törədilmiş əməlin və ya bu əməli törətmiş şəxsin ictimai təhlükəli olmadığı müəyyən edildikdə böyük ictimai təhlükə törətməyən cinayət və ya az ağır cinayət törətmiş şəxsin cinayət məsuliyyətindən azad edilməsi mümkündür.
Cinayət-Prosessual Məcəlləsinin 39-cu maddəsi cinayət təqibini istisna edən halları, 40-cı maddəsi cinayət təqibinin həyata keçirilməməsinə imkan verən halları, 305-ci maddəsi cinayət işi və ya məhkəməyədək sadələşdirilmiş icraatın materialları üzrə icraata xitam verilməsini tənzimləyir.
Konstitusiya Məhkəməsinin qərarına əsasən, Cinayət Məcəlləsinin 74-cü maddəsində nəzərdə tutulmuş hallar yalnız məhkəmə baxışının gedişində müəyyən edildikdə cinayət təqibinə xitam verilə bilər. Buna müdafiə tərəfinin razılığı gərəkdir.
O da qeyd olunur ki, Cinayət-Prosessual Məcəlləsində yer alan “cinayət qanunu müddəalarının qüvvəsinə görə” müddəası cinayət qanununun zamana və məkana görə qüvvəsinə əsasən cinayət məsuliyyətindən azad etməni nəzərdə tutur.
