Anım yürüşü
Sentyabrın 27-si Bakıda Anım Günü yürüşü keçirilib. 2020-ci ilin Vətən müharibəsində şəhid olan hərbi qulluqçulara, qətlə yetirilən mülki vətəndaşlara və itkin düşmüş şəxslərə ehtiram yürüşünə prezident, ali baş komandan İlham Əliyev, birinci vitse-prezident Mehriban Əliyeva da qatılıblar.
Mərasimdən sonra dövlət başçısı Vətən Müharibəsi Memorial Kompleksinin və Zəfər Muzeyinin təməlini qoyub.
İlham Əliyev və Mehriban Əliyeva Dənizkənarı Milli Parka da baş çəkiblər, Xəzərin sahil sularında sıralanan hərbi gəmilərdən fit səsi verilib, toplardan yaylım atəşi açılıb.
Xəbəri AZƏRTAC yayıb.
Ermənistan 1988-1994-cü illərin təcavüzündə Azərbaycanın bütün cənub-qərbini ələ keçirib.
2020-ci il sentyabrın 27-dən Azərbaycanın apardığı hərbi əməliyyatlarda və noyabrın 10-na keçən gecə əldə edilən atəşkəs razılaşması nəticəsində Cəbrayıl, Füzuli, Zəngilan, Qubadlı, Ağdam, Kəlbəcər rayonları tam, Şuşa, Laçın, Xocavənd, Xocalı rayonları və keçmiş Ağdərə rayonu qismən azad olunub.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi işğalda qalır.
Laçın şəhəri və rayonun 6 kəndi bölgədə atəşkəsə məsul Rusiya Ordusu bölmələrinin əlindədir.
Rəsmi məlumata görə, Vətən müharibəsində 2907 hərbi qulluqçu şəhid olub, 7 hərbi qulluqçu itkin düşüb.
Sentyabrın 27-si Azərbaycanda işğal altında olan torpaqlarının azad edilməsi uğrunda həlak olmuş şəhidlərin xatirəsini yad etmə günü – Anım Günü kimi rəsmiləşib.
