ABŞ prezidenti Cozef Bayden BMT Baş Assambleyasının 76-cı sessiyasının açılışındakı çıxışında dünyanı yeni pandemiyaya hazır olmağa çağırıb. Novator.az-ın məlumatına görə, Bayden deyib ki, insanların həyatını qurtarmaq, COVİD-19 infeksiyası ilə mübarizə aparmaq, habelə dünyanı yaxalayacaq növbəti pandemiyaya hazırlıqlı olmaq gərəkdir. Bundan ötrü dünya ölkələrini əl-ələ verməyə dəvət edən ABŞ prezidenti vurğulayıb ki, koronavirusun daha yoluxucu, daha təhlükəli variantları ortaya çıxanadək bütün mümkün vasitələr işə salınmalı, mübarizə imkanları səfərbər olunmalıdır.
Beynəlxalq statistikaya görə, indiyədək dünyada 230 milyondan çox adam koronavirusa yoluxub, onların 4 milyon 724 mindən çoxu həyatını itirib.
Ən çox yoluxma və ölüm ABŞ-da qeydə alınıb: 43 milyon 242 mindən çox yoluxma, 697 minə yaxın ölüm. Bu yoluxmaların 4,3 milyonu, ölümlərin 45 min 800-ü son dörd həftədə baş verib.
BMT Baş Assambleyasının 76-cı sessiyasının açılışı sentyabrın 21-də olub. Sessiya ayın 27-dək davam edəcək.
Mənbə: Whitehouse.gov
