Vidadi Mirkamalın pensiya müşkülü
Demokratik Qüvvələrin Milli Şurasının Koordinasiya Mərkəzinin üzvü, hüquqşünas Vidadi Mirkamal üzləşdiyi problemdən yazıb. Novator.az-ın məlumatına görə, o qeyd edir ki, 25 il Bakı Dövlət Universitetinin hüquq fakültəsində mühazirə oxuyub, hüquq mövzulu 14 kitabın və 200-ə yaxın məqalənin müəllifidir: “1992-2000-ci illərdə Ali Arbitraj Məhkəməsinin sədr müavini vəzifəsində işləmişəm. O zaman Ali Arbitraj Məhkəməsi Ali Məhkəmənin orqanı sayılırdı, 2008-ci ildə pensiyaya Ali Məhkəmənin sədr müavini statusunda çıxmışam.
1993-cü ildə mənə 1-ci ixtisas dərəcəli hakim rütbəsi verilib. Qanuna görə, bu ixtisas dərəcəsi alan hakimin maaşına və pensiyasına minimum əməkhaqqının beş misli məbləğində vəsait əlavə edilir. “Əmək pensiyaları haqqında” qanuna əsasən, hakimlərin maaşına edilən əlavələr pensiyaya çıxmış hakimlərə də tətbiq olunmalıdır. Mənimlə birlikdə işləmiş həmkarlarım bu müddəadan yararlandığı halda mənə münasibətdə bu norma tətbiq edilməyib. Ona görə də 2020-ci ildə Dövlət Sosial Müdafiə Fondunun Xüsusi Şərtlərlə Təyinat İdarəsinə ərizə ilə müraciət etdim. Aylarla ərizəmə cavab verilmədi. Şifahi olaraq bildirdilər ki, ərizəniz öyrənilir və baxılacaq.
Sonda məhkəməyə müraciət etmək məcburiyyətində qaldım. Mən məhkəməyə müraciət edən kimi idarə rəisi ərizəyə mahiyyəti üzrə cavab vermək əvəzinə mənə indiyədək ödənmiş rütbə pulunun qanunsuz olduğu və indiyədək ödənmiş 103 min manat məbləğin geriyə alınması haqda inzibat qərar verdi və həmin qərarla aldığım pensiyanın məbləği minimuma endirildi.
Həmin qərardan da məhkəməyə şikayət verdim. Məhkəmədə şikayətimə baxılmamış qərar icraya yönəldildi və icra məmurları dərhal mənim əmlakımın siyahıya alınmasına başladı. Bu qanunsuz və absurd hərəkətlərin qarşısı uzun hüquqi prodsedurlardan sonra müvəqqəti dayandırıldı. Lakin Bakı İnzibati Məhkəməsi və Bakı Apellyasiya Məhkəməsi mənim qanuni tələblərimin əsassız olması barədə absurd qətnamələr qəbul etdilər.
Oktyabr ayında Bakı İnzibati Məhkəməsində 103 min manat məbləğin məndən tutulması barədə işə baxılacaq. Görünən odur ki, yüksək instansiyalardan gələn sifariş əsasında bu işdə də mənim ziyanıma qətnamə qəbul ediləcək. İcra hakimiyyətinin əlində oyuncağa çevrilən məhkəmələrdən başqa qərar gözləmək olmaz”.
2013-cü ildə yaradılmış Demokratik Qüvvələrin Milli Şurasına tarixçi alim Cəmil Həsənli sədrlik edir. Qurumun Koordinasiya Mərkəzində Vidadi Mirkamalla yanaşı AXCP sədri Əli Kərimli, Müsavat Partiyasından Tofiq Yaqublu, sabiq deputat Gültəkin Hacıbəyli və başqaları təmsil olunur.
