“Praktiki siyasət” necə təqdim olunur?
Siyasi Menecment İnstitutunun ilk kitabı çapdan çıxıb: “Praktiki siyasət”. Novator.az bildirir ki, qurumun İdarə Heyətinin təmsilçisi, siyasi elmlər üzrə fəlsəfə doktoru, politoloq Azər Qasımlı “Praktiki siyasət”i belə təqdim edir: “Hər kəs siyasi lider ola bilməz. Lider doğulurlar. Lakin istənilən şəxs bilik və təcrübənin sayəsində siyasətçi ola bilər. “Praktiki siyasət” kitabı lider olmağı deyil, siyasətçi olmağı öyrədir.
Hər bir siyasətçi öz fəaliyyətində yan təsirlərlə yanaşı ilk növbədə zaman faktorunu nəzərə almalıdır. Siyasətdə bəzən nəyisə dəyişmək, yenilik etmək və nəsə yaratmaq mümkün olmur. Tarixi dəyişikliklər üçün sadəcə bilgi, bacarıq və təcrübə yetərli deyil. Dəyişikliklər üçün həm də zaman yetişməlidir…
Bu kitab zamanın ruhunu duymağı deyil, qalib gəlmək üçün nəyi və necə etməyi öyrədir. Zamanın ruhunu hiss etmək çox az adama nəsib olur. Lakin lider də olsanız, hətta zamanın ruhunu duysanız belə, qalib gəlmək üçün praktiki bilik və bacarıqlara sahib olmalısınız”.
Siyasi Menecment İnstitutu müasir siyasi texnologiyaları, dövlət idarəçiliyi və demokratiyaya keçid təcrübələrini araşdıran və ictimai əsaslarla tədris edən qeyri-formal təhsil mərkəzidir.
