Rusiyalıların neçə faizi paketdə maaş almağa hazırdır?
Rusiyanın Superjob.ru portalı nəzdindəki Tədqiqat Mərkəzi əhalinin qeyri-rəsmi yolla verilən maaşlara (paketdə maaş) münasibətini öyrənib.
Novator.az-ın məlumatına görə, sorğunun nəticələri göstərib ki, rusiyalıların 39%-i maaşların bu üsulla verildiyi yerlərdə işə düzəlməyə hazırdır.
Məlum olub ki, bəzi respondentlər öz ixtisasları üzrə iş tapmaqda çətinlik çəkdikləri hallarda, yaxud bir sıra şəxsi səbəblər üzündən paket üsulu ilə işləməyə razılaşırlar.
Sorğu zamanı respondentlərin 37%-i qeyri-rəsmi maaşla işləməyə hazır olmadığını söyləyib. Onlar bunu belə əsaslandırıblar ki, pensiya, ödənişli məzuniyyət və xəstəliyə görə bülletenə çıxma kimi sosial təminatlardan məhrum olmaq istəmirlər.
Respondentlərin 24%-i sorğunu cavablandırmaqda çətinlik çəkib.
Tədqiqat kişilərin (43%) qadınlardan (36%) daha çox paket üsulu ilə işləməyə razılıq verdiyini də üzə çıxarıb.
Paketdə maaş almağa hazır olan respondentlərin 41%-nin orta gəlirinin 30 min rubldan (təxminən 700 manat) aşağı olduğu aydınlaşıb.
Tədqiqat müəllifləri qeyd edirlər ki, 2020-ci ilin aprelində COVİD-19 infeksiyası ilə bağlı qapanma dövründə bu göstərici 46%-ə, dekabrda, koronavirus pandemiyasının ikinci dalğası zamanı 44%-ə çatmışdı.
Əmək bazarında gərginlik səngiyəndə isə paketdə maaş almağa razılaşanların da sayı azalır. Məsələn, 2020-ci ilin nisbətən sabit dövrü sayılan sentyabr ayında qeyri-rəsmi maaşla işləməyə razılıq verənlərin sayı 39%-ə enmişdi.
Mənbə: Vedomosti.ru
