Məhsula subsidiya qaydası yeniləndi
Prezident İlham Əliyev kənd təsərrüfatı məhsulları istehsalına subsidiya qaydasını yeniləyən fərman imzalayıb. 2019-cu ildə təsdiqlənmiş qayda fiziki və hüquqi şəxslərə dövlət vəsaiti hesabına subsidiyalar mexanizmini və şərtlərini müəyyən edir. Subsidiyalara məsul şuraya Kənd Təsərrüfatı Nazirliyinin 2, İqtisadiyyat Nazirliyi, Maliyyə Nazirliyi, Dövlət Statistika Komitəsi, Sahibkarlar (İşəgötürənlər) Təşkilatları Milli Konfederasiyası və yerli fermerlər assosiasiyasının 1 nümayəndəsi daxildir, rəhbərliyi kənd təsərrüfatı naziri həyata keçirir.
Şura əkin subsidiyasının, məhsul subsidiyasının və toxum subsidiyasının tətbiqi üçün bitkilərin və bitkiçilik məhsullarının siyahısının, onlara tətbiq edilən əmsalların və kvotaların təsdiqi barədə qərarlar çıxarır.
Novator.az bildirir ki, prezidentin 1 sentyabr 2021-ci il fərmanı ilə rəsmiləşən yeniliyə görə, şuranın təsdiqlədiyi siyahıya aqrar sığorta predmetinə aid olan bitkilər daxil edildiyi təqdirdə həmin bitkilərin ixrac yönümlü olması və ya ərzaq təhlükəsizliyinin təmin edilməsindəki rolu əsas götürüləcək.
Başqa bir dəyişikliyə əsasən, 10 hektar və daha çox torpaq sahəsində sığortalanmalı olan bitkinin becərilməsinə görə əkin subsidiyası sığorta müqaviləsi bağlandıqdan sonra veriləcək.
