Bəxtiyar Hacıyev Prezident Administrasiyasını da məhkəməyə verdi
İctimai fəal Bəxtiyar Hacıyev Prezident Administrasiyası və dövlət başçısı İlham Əliyevlə məhkəmə çəkişməsinə baş vurub. Bir müddət əvvəl fəal ölkə prezidentini Səbail Rayon Məhkəməsinə verib. Şikayət ərizəsində Bəxtiyar Hacıyev qeyd edib ki, İlham Əliyevin “Facebook” səhifəsi şəbəkədə onu blokladığı üçün dövlət başçısının paylaşdığı materiallara şərh yaza bilmir. O, “Facebook”dakı bloklanmanın qanunsuz sayılmasını istəyib.
“Turan”ın 31 avqust məlumatına görə, Səbail Rayon Məhkəməsi iddia ərizəsinə baxmaqdan imtina edib. Hakim Şahin Abdullayev imtina qərarını dövlət başçısının “Facebook” səhifəsini Prezident Administrasiyasının idarə etməsi ilə əsaslandırıb, qeyd edib ki, prezident cavabdeh sayıla bilməz.
Bəxtiyar Hacıyev hakimin arqumentlərini əsassız sayır və məhkəməyə təkrar müraciətdə cavabdehlər kimi həm prezidenti, həm də Prezident Administrasiyasını göstərib. İctimai fəal deyir ki, prezidentin “Facebook” səhifəsinin onu bloklaması ifadə azadlığına zəmanət verən ölkə konstitusiyasının və Avropa İnsan Hüquqları Konvensiyasının pozulmasıdır.
Prezident Administrasiyasının Milli Məclisə təqdim olunan qanun layihələrini, prezidentin fərman, sərəncam, tapşırıq və müraciətlərinin, habelə digər sənədlərin layihələrini hazırlamaq; qanunların, prezidentin fərman, sərəncam və tapşırıqlarının yerinə yetirilməsinə nəzarət; prezidentin siyasi partiya, ictimai birlik, həmkarlar ittifaqları və yaradıcı birliklər, habelə xarici ölkələrin dövlət orqanları və vəzifəli şəxsləri, yerli və xarici siyasi, ictimai xadimlər, beynəlxalq təşkilatlarla qarşılıqlı əlaqələrini təmin etmək və başqa səlahiyyətləri var.
Bakı şəhərinin İstiqlaliyyət küçəsində qərar tutan administrasiyanın yerləşdiyi bina Prezident Sarayı adlanır.
Administrasiyaya Samir Nuriyev rəhbərlik edir.
1982-ci il təvəllüdlü Bəxtiyar Hacıyev Bakı Dövlət Universitetinin və ABŞ-ın Harvard Universitetinin məzunudur. 2011-2012-ci illərdə həbsdə yatıb.
