Kəlbəcər və Laçında
Avqustun 16-da prezident İlham Əliyev birinci vitse-prezident Mehriban Əliyeva ilə birgə Kəlbəcər və Laçın rayonlarına baş çəkib.
AZƏRTAC xəbər verir ki, səfər zamanı Toğanalı-Kəlbəcər avtomobil yolu üzərində, Murovdağda inşa olunacaq tunelin təməli qoyulub, İlham Əliyev və Mehriban Əliyeva Kəlbəcər Kiçik Su Elektrik Yarımstansiyasında görülən işlərlə tanış olub, “Kəlbəcər” yarımstansiyasının açılışını ediblər.
Dövlət başçısının Kəlbəcər-Laçın avtomobil yolu üzərində inşa olunacaq tunelin və Laçın Beynəlxalq Hava Limanının təməllərini qoyduğu, Kəlbəcər şəhərində dövlət bayrağını ucaldıb çıxış etdiyi, N saylı hərbi hissədə, “İstisu” sanatoriyasında olduğu, Kəlbəcərdən Laçın rayonunun Minkənd kəndinə yolun çəkilməsi işlərinə baxdığı bildirilir.
Ermənistan 1988-1994-cü illərin təcavüzündə Azərbaycanın bütün cənub-qərbini işğal edib.
2020-ci il sentyabrın 27-dən Azərbaycanın apardığı hərbi əməliyyatlarda və noyabrın 10-na keçən gecə əldə edilən atəşkəs razılaşması nəticəsində Cəbrayıl, Füzuli, Zəngilan, Qubadlı, Ağdam, Kəlbəcər rayonları tam, Şuşa, Laçın, Xocavənd, Xocalı rayonları və keçmiş Ağdərə rayonu qismən azad olunub.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi işğalda qalır.
Laçın şəhəri və rayonun 6 kəndi bölgədə atəşkəsə məsul Rusiya Ordusu bölmələrinin əlindədir.
Prezident İlham Əliyev 2020-ci ilin noyabr ayında Füzuli, Cəbrayıl və Ağdamı, dekabr ayında Zəngilan və Qubadlını, 2021-ci ilin yanvarında Füzuli və Şuşanı, fevralında Füzuli, Zəngilan, Laçın və Cəbrayılı, martında Füzuli, Xocavənd və Şuşanı, aprelində Cəbrayıl və Zəngilanı, mayında Şuşa və Ağdamı, iyununda Füzuli və Şuşanı ziyarət edib.
