Messi yeni ünvanda
Məşhur futbolçu Lionel Messi avqustun 11-i Fransanın paytaxtı Parisdə, yeni klubu “Pari Sen-Jermen”in (PSJ) oynadığı “Park de Prens” stadionunda təqdim edilib.
Novator.az bildirir ki, 1970-ci ildə yaradılan PSJ 9 dəfə Fransa çempionu olub, 14 dəfə Fransa kubokunu, 1 dəfə UEFA Kuboklar kubokunu qazanıb.
Lionel Messi yetirməsi olduğu İspaniyanın “Barselona” klubundan avqustun 5-də ayrılıb, ötən gün PSJ ilə müqavilə imzalayıb.
1987-ci il iyunun 24-də Argentinanın Rosario şəhərində doğulan Lionel Messi “Barselona”da 2004-cü ildən oynayıb, 10 dəfə İspaniya çempionu, 4 dəfə UEFA Çempionlar Liqasının qalibi olub, 3 dəfə UEFA superkubokunu əldə edib, 3 dəfə klublar arasında dünya çempionluğunu qazanıb.
2005-ci ildən Argentina milli komandasında çıxış edən Lionel Messi olimpiya çempionu (2008), dünya çempionatının gümüş mükafatçısı (2014), Amerika kubokunun sahibidir (2021).
Lionel Messi 2009, 2010, 2011, 2012, 2015, 2019-cu illərdə dünyanın ən yaxşı futbolçusu kimi “Qızıl top” mükafatı alıb.
