Gəlir 2,2 faiz, xərc 1,2 faiz azalıb (Büdcə hesabatı)
Maliyyə Nazirliyinin hesabatına görə, yanvar-iyun aylarında dövlət büdcəsinin gəlirləri 2020-ci ilin ilk yarısı ilə müqayisədə 2,2 faiz, xərcləri 1,2 faiz azalıb, gəlirlərin 50,1 faizi qeyri-neft sektorundan təmin olunub, qeyri-neft gəlirləri 12,4 faiz artıb, neft gəlirləri 13,5 faiz düşüb.
Gəlirlərdə əsas pay kimi Dövlət Neft Fondundan transfert (40 faiz) və Dövlət Vergi Xidmətinin xətti ilə daxilolmalar (36,9 faiz) göstərilir.
Rəsmi məlumata əsasən, 6 ayda dövlət büdcəsi xərclərinin proqnoza qarşı icrası müdafiə və milli təhlükəsizlik bölümü üzrə 2,3 faiz çox, səhiyyə bölümü üzrə 2,7 faiz, sosial müdafiə və sosial təminat üzrə 3 faiz, məhkəmə hakimiyyəti, hüquq mühafizə və prokurorluq üzrə 3,8 faiz, əsas bölmələrə aid edilməyən xərclər üzrə 4,5 faiz, ümumi dövlət xidmətləri üzrə 4,6 faiz, mədəniyyət, incəsənət, informasiya, bədən tərbiyəsi, gənclər siyasəti və bu qəbildən olan digər fəaliyyət üzrə 5,4 faiz, təhsil sahəsi üzrə 6 faiz, iqtisadi fəaliyyət üzrə 6,8 faiz, kənd təsərrüfatı üzrə 15 faiz, ətraf mühitin mühafizəsi üzrə 20,6 faiz, mənzil, kommunal təsərrüfatı üzrə 27,3 faiz az icra edilib.
Qeyd olunur ki, ötən ilin yanvar-iyun ayları ilə müqayisədə dövlət büdcəsinin xərclərində müdafiə və milli təhlükəsizlik üzrə 73,9 faiz, səhiyyə üzrə 24,6 faiz artım var.
“2021-ci ilin dövlət büdcəsi haqqında” qanunda gəlirlər 25 milyard 427 milyon manat, xərclər 28 milyard 543 milyon manat nəzərdə tutulur.
