UEFA-nın əsas klub turniri olan Çempionlar Liqasında oynanmamış bir təsnifat mərhələsi qalır. Novator.az bildirir ki, son ələmə raundunda (17-25 avqust) Xorvatiyadan “Dinamo”, İsveçdən “Malmö”, Bolqarıstandan “Ludoqorets”, Macarıstandan “Ferensvaroş”, Moldovadan “Şerif”, İsveçrədən “Yanq Boyz”, Niderlanddan PSV, Fransadan “Monako”, Portuqaliyadan “Benfika”, Ukraynadan “Şaxtyor”, Avstriyadan “Zalsburq”, Danimarkadan “Brondbü” yer alır.

İspaniyadan “Atletiko”, “Real”, “Barselona”, “Sevilya”, “Vilyarreal”, İngiltərədən “Mançester Siti”, “Mançester Yunayted”, “Liverpul”, “Çelsi”, Almaniyadan “Bavariya”, “Leypsiq”, “Borussiya” (Dortmund), “Volfsburq”, İtaliyadan “İnter”, “Milan”, “Atalanta”, “Yuventus”, Fransadan “Lill”, PSJ, Portuqaliyadan “Sportinq”, “Portu”, Rusiyadan “Zenit”, Belçikadan “Brügge”, Ukraynadan “Dinamo”, Niderlanddan “Ayaks”, Türkiyədən “Beşiktaş” mübarizəyə qrup mərhələsindən (14 sentyabr-8 dekabr) başlayacaq.

2021-2022 mövsümünün komandalarından 14-ü yarışda titul sahibidir. 1955-ci ildə yaradılan, 1991-ci ilə qədər Çempionlar kuboku adı daşımış turnirdə “Real” 13, “Milan” 7, “Bavariya” və “Liverpul” 6, “Barselona” 5, “Ayaks” 4, “İnter” və “Mançester Yunayted” 3, “Benfika”, “Yuventus”, “Portu” və “Çelsi” 2, PSV və “Borussiya” 1 uğur əldə edib.

Çempionlar Liqasının dördüncü mərhələsində ələnən və qrup mərhələsində üçüncü yeri tutan komandalar Avropa Liqasına transfer olunacaq.