Mərkəzi Bank avqustun 6-da ABŞ dollarının məzənnəsini 1,7 manat səviyyəsində saxlayıb. Bu rəsmi kurs avqustun 9-dək qüvvədə olacaq, qiymət sabitliyinin 3 il 5 ayı tamamlanacaq.

2015-ci ilin devalvasiyaları nəticəsində dolların rəsmi qiyməti 0,7844 manatdan 1,5594 manata yüksəlib, 2016-cı ildə kurs 1,7707 manata çatıb. 2017-ci ili 1,7001 manatla yola salan dollar 2018-ci il martın 7-dən 1,7 manata təklif olunur.

Dövlət Neft Fondu Mərkəzi Bankın 2021-ci ilin yanvar-iyul aylarında keçirdiyi valyuta hərraclarında 3 milyard 227,7 milyon dollar ABŞ dolları məbləğində vəsait satıb. Novator.az bildirir ki, yanvarda fonddan 644,9 milyon dollar, fevralda 437,3 milyon dollar, martda 397,7 milyon dollar, apreldə 509,9 milyon dollar, mayda 312,7 milyon dollar, iyunda 463,6 milyon dollar, iyulda 461,6 milyon dollar alınıb.

Manatı qorumaq üçün Dövlət Neft Fondu 2016-cı ildə 4,9 milyard, 2017-ci ildə 3,6 milyard, 2018-ci ildə 6,5 milyard, 2019-cu ildə 6,6 milyard, 2020-ci ildə 7,3 milyard dollar sərf edib.